Dekabrın 14-ü Azərbaycan Anime Cəmiyyəti Yaponiya mədəniyyətinin ayrılmaz hissəsi olan anime və manqanı bütün dünyada məşhur edən Hayao Miyazakinin adına həsr olunmuş tədbir keçirib.

"Axar.az" xəbər verir ki, tədbirdə yapon animelərinin "cosplay"i (anime personajlarının geyim nümayişi), yapon şirniyyatları, anime qəhrəmanlarının şəkilləri və əl işləri nümayiş olundu. Eləcə də yarışlar keçirildi, qaliblər hədiyyə qazandı. Mükafatlar Yaponiya səfirliyinin dəstəyi ilə təşkil edilib.

Azərbaycan Anime Cəmiyyətinin rəhbəri Çinarə Əhmədova bildirdi ki, tədbirin əsas məqsədi bütün dünyada məşhur olan yapon animelərini Azərbaycanda da məşhurlaşdırıb Azərbaycan dilli kontingent yaratmaqdır.

"Axar.az" müxbiri olmaqdan əlavə bir animesevər kimi qeyd edə bilərəm ki, tədbirin əsas məqsədlərindən biri də tənbəllik etmədən kostyumlar hazırlayıb yarışda iştirak edən, şəkillər çəkən anime və manqanı bu qədər çox sevən insanları bir yerdə toplayaraq onlara mənəvi rahatlıq və sevinc bəxş etmək, yeni dostluqlara şərait yaratmaqdır.