Dünya Kubokunu qazanmaq heç bir komandaya düşərli olmur. Bunu 4 il öncə dünya çempionu olmuş İspaniya komandası builki çempionatda elə ilk oyunda Hollandiyaya biabırçı hesabla məğlub olması ilə sübut etdi.

Bütün dünya Kubokun lənətlənmiş olduğunu düşünür. Əslində, səbəbsiz deyil.

Axar.az Dünya Çempionatı kubokunun lənətlənmiş olduğunu az-çox sübut edəcək maraqlı faktları sizə də təqdim edir.

Uruqvayın İtaliya "lənəti"

1930-cu ildə keçirilən ilk futbol üzrə Dünya Çempionatının qalibi Uruqvay Milli Komandası olub. Ancaq 1934 və 1938-ci illərdə keçirilən DÇ-yə qatıla bilməyib. Bunun ardından 2 dəfə ard-arda çempionluq İtaliya yığmasına qismət olub.

Uruqvay 1950-ci ildə keçirilən DÇ-yə qatılaraq son dəfə çempion olduğundan bəri final üzü görməyib.

Əfsanəyə görə, İtaliya bundan sonra 2 dəfə ard-arda çempion olmazsa, Uruqvay da final üzü görməyəcək.

Qrup mərhələsindən çıxa bilməyən ilk çempion: İtaliya

Uruqvaydan sonra üst-üstə 2 dəfə çempion olan İtaliya 1950-ci ildə Braziliyada keçirilən çempionatda qrup mərhələsində məğlubiyyətə düçar olmuşdu. Kuboku qazanmaq ona da düşərli olmayıb.

B"rəzil"ya

Braziliya 1958 və 1962-ci illərdə ard-arda dünya kubokunu qazanıb. Ancaq ardınca 1966-cı ildə İngiltərədə keçirilən DÇ-də Macarıstan və tarixdə ilk dəfə DÇ-yə qatılan Portuqaliya yığmalarına 3:1 hesabıyla məğlub olaraq vaxtından tez evə qayıtmaq məcburiyyətində qalıb. Bu lənətli kuboku qazanmaq onlara da düşərli olmayıb.

Bir Fransız hekayəsi

Tarixdə bir dəfə 1998-ci ildə kuboku başları üzərinə qaldıran Fransa yığması ardınca 2000-ci ildə də Avropa çempionu oldu. Fransa artıq dünya komandaları arasında favoritlərdən birinə çevrilmişdi. Lakin 2002-ci ildə DÇ-yə qatılan yığma elə ilkin mərhələdə qrupu sonuncu yerdə tərk edərək hamını şoka saldı. Kuboku qazanmaq "xoruzlar"a da düşərli olmadı.

Braziliyanın "yaxasına yapışan" çempion

İtaliya 2006-cı ildə Almanyada çempion olmaqla kubok sayını eyniləşdirərək Braziliyanın "yaxasına yapışan" ölkələrdən oldu. 2010-cu ildə favorit olaraq gəldiyi Cənubi Afrikada keçirilən çempionatın ilkin mərhələsində məğlubiyyətə uğradı. Yeni Zellandiyanı belə məğlub edə bilmədən sonuncu yerdə qərar tutaraq göz yaşları içində evə qayıtmalı oldu. Kubok qazanmaq bir daha mavi formalılara düşərli olmayıb.

Matadorun həzin sonu: İspaniya

Avro 2008, DÇ 2010, Avro 2012-də kubokları ard-arda qazanan İspaniya 2014-cü ildə çempionata damğa vuracaq gözləntisini darmadağın olmaqla əvəz etdi. Biabırçı şəkildə Hollandiyaya 5:1, Çiliyə isə 2:0 hesabla məğlub olaraq evə yollandı. Kubok qazanmaq buğalara da düşərli olmayıb.

Amerikanın ayağı Avropaya düşmür

Dünya Çempionatları tarixində Cənubi Amerikada keçirilən heç bir DÇ-də Avropa yığmaları çempion olmayıb.

DÇ tarixində Avropa komandalarından heç biri, hətta Şimali Amerikada da keçirilən çempionatlarda bir dəfə də olsun kubok qazanmayıblar. Bu materikdə keçirilən çempionatlarda bütün kubokları Braziliya və Argentina qazanıb.

Berlin divarı lənəti

Ən son 1990-cı ildə dünya kubokunu başları üzərinə qaldıran Almaniya millisi Berlin divarı dağılandan sonra çempionluq sevinci yaşamayıb. Almaniya Futbol Federasiyası hətta çıxış yolu olaraq Berlin divarını yenidən hördürməyi belə təklif etmişdi.

Final lənəti: Portağal rəngi

DÇ kuboklarını qazanan İngiltərə, Uruqvay və Fransadan daha çox finala qədər gələn Hollandiya yığma komandası çempionat tarixində heç cürə kubok qazana bilməyib. Narıncı rəngin lənətli olmasından şübhələnən hollandlar bu il DÇ-yə fərqli rənglərlə gəlməyi planlaşdırırmışlar. Dəyişiklik tam olmasa da, narıncı rəng nisbətən tündləşdirilib.

Braziliyanın kubok lənəti

Braziliya 1970-ci ilə qədər bu çempionatda dörd final oyunundan 3-nü qazanıb. 1970-ci ildən sonra isə 24 il final üzü görməyib. Braziliya bu lənəti yalnız 1994-cü ildə ABŞ-da keçirilən çempionatda pozaraq, kuboka yiyələnmişdi.

İngiltərənin ada lənəti

İngiltərə öz torpağlarında ev yiyəsi olduğu və yeganə qazandığı 1966-cı il DÇ kuboku xaricində heç bir çempionatda final oynaya bilməyib.

Ayaqyalın oyun - 1950-ci il

1950-ci ildə tarixində ilk və son dəfə DÇ-yə qatılan Hindistan millisi futbol meydançasına ayaqyalın çıxmaq istədiklərini bildirmişdi. Lakin icazə verilmədiyi üçün onlar lənət cadusu edərək evlərinə qayıtmışdı. Deyilənə görə, o vaxta qədər bütün dünya kuboklarını qazanan İtaliya və Uruqvay bu cadudan təsirlənib və İtaliya 32 il boyunca kubok qazana bilməyib. O ilin çempionu Uruqvay 64 ildir ki, hələ də final oyunu belə oynaya bilmir. Uruqvay bu lənət cadusunun pozulması məqsədilə Hindistanla yoldaşlıq görüşü keçirməyi belə gündəmə gətirmişdi.