Almaniya milli komandasının oyunçuları Braziliya millisi ilə yarımfinal oyununda ilk yarıdan sonra, fasilə zamanı (onda hesab 5:0 idi) rəqiblərini "daha da alçaltmamaq" üçün öz aralarında razılığa gəliblər.

Axar.az ingilisdilli "Deyli Miror" qəzetinə istinadən xəbər verir ki, bu sözləri Almaniya millisinin müdafiəçisi Mats Humels deyib:

"İlk yarıda fasilə zamanı meydana qayıdanda şou göstərməmək və oyuna fokuslanıb rəqibimizi daha da alçaltmamaqla bağlı aramızda razılığa gəldik".

Qeyd edək ki, iyulun 8-də Dünya Çempionatının yarımfinal oyunu çərçivəsində Almaniya Braziliyanı 7-1 hesabı ilə məğlub edərək tarixi nəticəyə imza atmışdı.

Bazar günü, iyul ayının 13-də final oyununda Almaniya Argentina yığma komandası ilə üz-üzə gələcək.