Kult.az Güney azərbaycanlı gənc şair Çağla Nurvəşin şeirlərini təqdim edir:

Sevgilim,

Məni axtarmaq istəyirsənsə,

Xiyabanlarda,

yetim uşağın əllərində,

qırmızı gülün üstündə

yatan tozam.

Bilmirəm yaşamı

mən necə,

hara yozam...

Sevgilim,

Mən illərdir kitabxanalarda

kitabların

yuxuya keçmiş sətirləriyəm.

Gecə-gündüz

çalışan fəhlələrin

alnındakı təriyəm.

Sevgilim,

Mən,

Mən çox yaxındayam

Məni uzaqlarda axtarma!..

Bir gəlin köçür...

Xəyal evimdən bir gəlin köçür,

Gözləri buludtək dolubdur onun.

Vəfasız dünyada doğulan gündən,

Qəm-kədər qəlbində olubdur onun.

Xəyal evimdən bir gəlin köçür,

Əlində saralıb, solubdur gülü.

Cismi yalan yerə ayaq üstədir,

İçindəki ruhu ölüdür, ölü.

Xəyal evimdən bir gəlin köçür,

Atasız, anasız, qardaşsız gəlin.

Yetim arzuludur, yetim duyğulu,

Matəmli oynayır sirdaşsız gəlin.

Xəyal evimdən bir gəlin köçür,

Dövrəsin özgələr alıbdır, nədən?

Yoxdur bir kimsəsi, qala qaydına,

Özü-öz qaydına qalıbdır, nədən?

O gəlinin adı bilmirəm nədir.

Ancaq ozanların dilindədir o.

Gedir yad evinə, gözündə nəmlə,

İndi bir ağ atın belindədir o.