Bakı və Tehran müxtəlif sahələrdə əməkdaşlığı intensiv şəkildə inkişaf etdirir və ən yüksək səviyyədə əsas məsələlərdə çoxdan gözlənilən qarşılıqlı anlaşmanı təsdiqləyib.

Bunu Axar.az-a rusiyalı ekspert Vitali Arkov İrandakı iğtişaşlar və onun qonşu ölkələrə təsiri ilə bağlı şərh verərkən deyib.

“Bir tərəfdən bu belədir. Digər tərəfdən, Azərbaycanın İsraillə əla münasibətləri var və bu münasibətləri təkcə öz maraqları naminə deyil, həm də yaxın qonşusu Türkiyənin maraqları naminə gücləndirir və genişləndirir”, - o bildirib.

Arkov həmçinin Donald Trampın Ağ Evə qayıtmasından sonra Bakı ilə Vaşinqton arasında əla münasibətlərdən danışıb:

“Eyni zamanda, Azərbaycan rəhbərliyinin İsrailin və ya ABŞ-ın İrana qarşı hərbi təcavüzü üçün öz ərazisini və hava məkanını təmin etməyə razı olduğunu təsəvvür etmək çətindir. Yeri gəlmişkən, Paşinyanın rəhbərliyi altında Ermənistan haqqında bunu demək olmaz... İndi, kənardan göründüyü kimi, Azərbaycanın mövqeyi neytraldır və gözləmə mövqeyindədir. Lakin genişmiqyaslı hərbi əməliyyatlar baş verərsə, Azərbaycan çətin bir seçimlə üzləşə bilər: məcburi qaçqına çevrilmiş və qaçılmaz olaraq öz sıralarında SEPAH casusları, döyüşçüləri olan (milli təhlükəsizliyə birbaşa təhdiddir) yüz minlərlə İran azərbaycanlısı üçün quru sərhədini açmaq, yoxsa onu bağlı saxlamaq və bununla da müsəlman dünyasının qınaqları ilə üzləşmək?”