Deputat Kamal Cəfərov yazır: "Dövlət qulluğu sistemində elə bir mexanizm yaratmalıyıq ki, ən ucqar kənddə işləyən gənc hiss etsin və bilsin ki, biliyinə, bacarığına və fəaliyyətində göstərdiyi nailiyyətlərə görə mərkəzi aparatda yüksək vəzifəyə təyin oluna bilər".

Axar.az xəbər verir ki, bu sözləri Almaniyada yaşayan tanınmış hüquq müdafiəçisi Əlövsət Əliyev bildirib.

"Yanaşma yanlışdır, əslində, elə şərait yaradılmalıdır ki, çoxluq regiona getməyə can atsın. Region mərkəzə aparan keçid məntəqəsi yox, yaşamaq, işləmək və qurmaq üçün ən arzu olunan məkan olmalıdır.

Bir gənc mütəxəssis regiona sabah mərkəzə köçmək üçün getməli deyil. O, regiona:

- orada həyat keyfiyyəti yüksək,

- qazancı qənaətbəxş,

- sosial təminatı güclü,

- peşəkar fəaliyyətin yaxşı dəyərləndirildiyi,

- ailəsi üçün şəraitin şəhərdən geri qalmadığı üçün getməlidir.

Belə olduqda həm də daxili miqrasiya inzibati yollarla deyil, təbii seçimlə tənzimlənir.

Dövlət qulluğunda mexanizm də buna uyğun qurulmalıdır. Mərkəzə keçid vəzifə yüksəlişinin yeganə göstəricisi olmamalıdır. Əksinə, regionda qalmaq, orada nəticə göstərmək, icmanı inkişaf etdirmək ən yüksək peşəkarlıq göstəricisi sayılmalıdır.

O zaman rayona gedirəm deyən və gələcəyini orada qurmaq istəyənlər daha çox olacaq, cənab Cəfərov!", - hüquqşünas qeyd edib.