"Amnesti İnternəşnl" (Amnesty International) təşkilatı fevralın 17-də Azərbaycan məhkəməsinin erməniəsilli şəxslər barədə çıxardığı hökm barədə tamamilə əsassız, böhtan xarakterli açıqlama ilə çıxış edib.

Axar.az xəbər verir ki, bu barədə Qərbi Azərbaycan İcması bəyanat yayıb.

"Öncə vurğulamaq istərdik ki, Qərbi Azərbaycan İcması müxtəlif vaxtlarda "Amnesti İnternəşnl" təşkilatına Ermənistandan deportasiya olunmuş azərbaycanlıların pozulmuş hüquqlarının bərpasına kömək etməsi xahişi ilə müraciət etmişdi. Lakin təşkilat olduqca mücərrəd cavab verərək ədaləti dəstəkləməkdən boyun qaçırmışdır", - bəyanatda bildirilib

İcma qeyd edib ki, 17 fevral açıqlaması ilə qurum bu mücərrəd cavabın səbəblərini bir daha göstərib:

"Təşkilat özünün kağız üstündə bəyan etdiyi nəcib dəyərlərə xəyanət edərək işğalçının, etnik təmizləmə, bir həftə sonra 34-cü ildönümü anılacaq Xocalı soyqırımını törədən canilərin yanında olduğunu, insan haqlarına, insan iztirablarına, humanitar fəlakətlərə yalnız siyasi prizmadan yanaşdığını nümayiş etdirmişdir. "Amnesti İnternəşnl" belə saxtakar mövqeyi ilə bu gün dünyada beynəlxalq təsisatlara etibarın kəskin şəkildə zədələnməsinə öz "töhfəsi"ni verməkdədir".