Rusiya ilə İran arasında münasibətlər strateji tərəfdaşlıq səviyyəsindədir, lakin bu, klassik müttəfiqlik demək deyil. Müttəfiqlik qarşılıqlı hərbi öhdəlikləri nəzərdə tutur. İranla imzalanmış Strateji Tərəfdaşlıq sənədində isə birbaşa hərbi yardım maddəsi yoxdur. Sadəcə qeyd olunur ki, tərəflərdən birinə təcavüz olarsa, həmin təcavüzkar ölkə ilə əməkdaşlıq edilməyəcək.

Bu sözləri Axar.az-a açıqlamasında politoloq Fərhad Məmmədov Rusiya-İran münasibətlərini və Moskvanın regiondakı imkanlarını şərh edərkən deyib.

Onun sözlərinə görə , Rusiya ənənəvi olaraq tərəfdaşlarını iki əsas vasitə ilə dəstəkləyirdi:

“Biri BMT Təhlükəsizlik Şurasındakı daimi üzvlüyü və veto hüququ, digəri isə birbaşa hərbi yardım və müdaxilə idi. Lakin hazırda beynəlxalq münasibətlər sistemi iflic vəziyyətdədir və Təhlükəsizlik Şurasının qətnamələri real təsir gücünü itirib. Digər tərəfdən, Ukrayna müharibəsi şəraitində Moskva hərbi resurslarını öz ehtiyacları üçün saxlayır.

Bundan əlavə, Rusiya əvvəllər diplomatik vasitəçi kimi də çıxış edirdi. Ancaq son illərdə Yaxın Şərqdə mövqeləri zəifləyib və artıq ona vasitəçilik üçün müraciətlər də olunmur. Bu baxımdan, İranla bağlı proseslərdə və ümumiyyətlə Yaxın Şərqdə gedən hadisələrdə Rusiyanın ciddi rol oynayacağı inandırıcı görünmür”.

Qeyd edək ki, İsrail və ABŞ 28 fevraldan İrana qarşı hərbi əməliyyata başlayıb. Endirilən zərbələr nəticəsində İranın ali dini lideri Əli Xamenei başda olmaqla, onlarla yüksək səviyyəli məmur ölüb.