Milli Məclisin çox hörmətli deputatlarından Rüfət Quliyev “iqtisadçı olaraq” olduqca peşəkar açıqlama ilə çıxış edib – sosial şəbəkələrdə yayılır və maraqla da qarşılanır. Çünki sözü deyən şəxs mötəbər döş nişanına malikdir.

Deputatımız bildirir: “ABŞ və İsrailin özündə hərbi sursatlar tükənir. Təsəvvür edin, iqtisadçı kimi deyirəm: İran o tərəfdən 100 dənə dron-kamikadze göndərir. Onun biri 3-5 min dollar da eləmir. Onları “Petriot”la (“Patriot”) vururlar. “Petriot” raketinin biri 2 milyon dollardır. Sən nə qədər 5 minlik hərbi sursatı 2 milyon dollarlıq raketlə vuracaqsan? Buna heç bir iqtisadiyyat dözməyəcək”.

Deputatımızın “3-5 min dollar” olaraq dediyi İran kamikadze-dronlarının qiyməti 20 min dolların üstündədir – bu bir!

İkincisi, özünü savadlı göstərmək üçün “partiot”a “petriot” deməyə heç bir ehtiyac yoxdur. Bu söz HHM sisteminin adına verilməzdən öncə dilimizə “patriot” kimi qəbul olunub – məsələn, “avtobus” sözü kimi. Halbuki “bus” yox, “bas” kimi oxunmalıdır. Ancaq dilimiz “bus” olaraq qəbul etdiyi üçün bu sözə “bas” deyə bilməzsən.

Yəni bu kontektdə “Patriot” sisteminə “Petriot” demək ingilis dili haqda təsəvvürünün olduğu görüntüsü yarada bilər, əvəzində Azərbaycan dilini bilmədiyinin göstəricisidir. Azərbaycan Milli Məclisinin deputatı isə ingilis yox, ilk növbədə Azərbaycan dilini bilməsi ilə qürrələnməlidir.

Üçüncüsü, peşəkar iqtisadçı kimi danışan deputatımız deyəsən ABŞ iqtisadiyyatı haqda normal informasiyaya və təsəvvürə malik deyil. ABŞ-ın yalnız hərbi büdcəsi 1 trilyon dollara yaxındır. İranın hərbi büdcəsi isə cəmi 10 milyard dollardır.

ABŞ iqtisadiyyatı dünya üzrə ÜDM-in 25 faizini təşkil edir – yəni bunu təsəvvür edə bilirmi bizim sayğıdəyər iqtisadçı, savadlı, intellektual deputatımız?

İranda iqtisadiyyat məhv olub, yanvar qırğınları məhz iqtisadi çöküşün fəsadları idi: İran ona görə qarışdı ki, dollar qəfildən bahalaşdı. Hazırda dollar bu ölkədə 170 min tümən civarındadır, minimum maaş isə 15 milyon tümən – yəni 100 dollardan da azdır...

2001-ci ili xatırladım. 11 Sentyabrdan sonra ABŞ Əfqanıstana qarşı hərbi əməliyyatı yeni başlatmışdı. Həmin vaxt Rusiyanın mərkəzi kanallarından birində “Xəbərlər” proqramından sonra “A” adlı günün siyasi-ictimai təhlili gedirdi. O dövr üçün ümumu ənənə idi, bütün ölkələrin kanallarında “Xəbərlər”dən sonra 5 dəqiqəlik siyasi baxış təqdim edilirdi (ANS-də Orxan Fikrətoğlunun müəllif verilişi o qəbildən idi).

Demək, ABŞ B-2-ləri göndərib, Əfqanıstana bomba yağış kimi yağır. Eynilə bizim deputatımız Rüfət Quliyev kimi biriləri çıxıb deyir ki, ABŞ 2 milyonluq bomba ilə Əfqanıstanda 300 dollarlıq çadırları vurur.

“A”nın məşhur şərhçisi tarixə keçən bir söz demişdi: “Doğrudur, ABŞ 2 milyonluq bomba ilə 300 dollarlıq çadırı vurur. “A” – (lakin) ABŞ üçün 2 milyon dollar heç nədir, Əfqanıstan iqtisadiyyatı üçünsə 300 dollar hər şeydir”.

Görünür, bizim deputatımızın iqtisadi bilikləri siqaret alveri ilə məhdudlaşır...