Türkiyə Daxili İşlər Nazirliyi “Türkiyənin İŞİD-lə mübarizəsi” adlı kitab yayımlayıb.

Axar.az xəbər verir ki, kitabda İŞİD-ə qoşulmaq istəyənlər haqqında məlumatlar yer alıb.

İndiyə qədər Suriyadakı hərbi fəaliyyətlərdə iştirak etdiyinə görə 252 Azərbaycan vətəndaşı Türkiyədən deportasiya edilib. 1677 azərbaycanlının isə terrorizmdə şübhəli bilindiyinə görə Türkiyəyə girişinə qadağa qoyulub.

Türkiyədən indiyə qədər ən çox deportasiya olunanlar Rusiya vətəndaşlarıdır. Deport edilən ruslar 804 nəfər təşkil edib. İkinci yerdə 435 nəfərlə İndoneziya, üçüncü yerdə 308 nəfərlə Tacikistan qərarlaşıb. Azərbaycan siyahıda altıncı yerdə mövqe tutub.

Türkiyəyə girişinə yasaq qoyulan vətəndaşlar ən çox Səudiyyə Ərəbistanı, Tunis, Qazaxıstan, Rusiyadandır. Azərbaycan bu siyahıda 9-cu yeri tutub.