Ukraynada hadisələr gərgin olaraq qalmaqda davam edir. Ölkənin şərqinə mərkəzi hökumət nəzarət etməyə çalışır. Mərkəzin özündə siyasi savaşlar hələ də davam edir. Ölkədə Rusiya təsirini tam yığışdırmaq mümkün olmayıb. Bizim region üçün də önəmli olan ölkəni daha dəqiq öyrənmək üçün "Espresso TV"nin məşhur jurnalisti Ənvər Derkaça müraciət etdik.

- Yeni Ukraynadan bir az bəhs edə bilərsinizmi?

- Ukrayna hazırda icraedici, qanunverici və məhkəmə hakimiyyəti balanslaşdırılmamış vəziyyətindədir. Ölkədə Yanukoviç dövründə vəzifədə olan kadrların əvəz olunması prosesi gedir. Sistem müqavimət göstərir. Yanukoviçin qvardiyasında olan köhnə kadrlar yeni rəhbərliyə çıxış axtararaq, danışıqlar aparmağa cəhd edirlər. Maydanın tələblərindən biri olan məhkəmələrin təmizlənməsi həmin qurumlarda olan zümrənin açıq sabotajları ucbatından hələ də reallaşdırıla bilməyib. Həmçinin buna Radanın məntiqsiz fəaliyyəti də şərait yaradıb. Yanukoviçin qaçmasından sonra məhkəmə sistemində etibarlılığın bərpası haqqında qanunun qəbulu gözlənilən nəticələri vermədi. Qanuna əsasən, ölkədəki bütün məhkəmə hakimləri vəzifələrindən qovulmalı və yerlərinə yenilərini seçmək şansları yaranmışdı. Əksər məhkəmələr öz iclaslarında keçmiş siyasi rejimin qalıqları olan şəxsləri yenidən sədrliyə qaytardılar.

Xainlər Radada gizlənir

- Bəs Rada necə? Mən bildiyim qədərilə orada xəyanətkarlar var.

- Rada yenidən formalaşır. Bir zamanlar Yanukoviçin fraksiyasında olan deputatlar kütləvi şəkildə buranı tərk edirlər. Onların arasında bəziləri öncələr açıq-aşkar, hazırda isə gizli şəkildə, yeni oyun qaydalarınca Ukraynanın düşmənləridir. Məhz bu şəxslər Rusiyanın ölkə üzərində nəzarətinin tərəfdarıdır. Məhz onların sayəsində artilleriya və digər zirehli texnikaların iştirakı ilə artıq bir neçə həftədir döyüşlərin getdiyi rayonlarda hərbi vəziyyət elan olunması ilə bağlı qanun qəbul olunmur. Hərbi vəziyyət isə Poroşenkoya müharibədən çıxmaq üçün bütün imkanları vermiş olardı. Həmçinin separatçılara qarşı Silahlı Qüvvələrin tam formada hərəkətə keçməsi üçün imkan yaradardı. Hələlik anti-terror əməliyyatlarını bir zamanlar Maydana təzyiqlər edən DİN-in xüsusi təyinatlıları və keçmiş maydançılardan təşkil olunmuş Milli Qvardiya aparır.

- Bəs ukraynalılar Poroşenkonun Putinlə danışıqlarına necə yanaşırlar?

- Poroşenko əla menecerdir. Lakin onun müharibə şəraitində idarəçilik qabiliyyəti yoxdur. Bizim insanların əksəriyyəti hesab edir ki, o, Putinə çox güvənir. O, hər dəfə Putinlə münaqişəni sülhlə həll etməyə çalışması ilə bağlı danışanda sərhəddə ya bizim əsgərlərə tərəf güllə atılır, ya da zirehli texnikalar sərhəddən keçir. Bu situasiya ukraynalılar üçün başadüşülməzdir.

- Deyəsən, Ukrayna getdikcə süquta uğrayır...

- Mən hər dəfə keçmiş hadisələri xatırlayarkən, cəbhədən geri dönən könüllülərlə danışıram. Nədənsə hər dəfə azərbaycanlı dostlarımın bir zamanlar mənə danışdıqları prezident Əbülfəz Elçibəy hakimiyyətinin son ayları yadıma düşür. Bax, burada da milli maraqlara qarşı hazırlanan bu formada genişmiqyaslı xəyanət atmosferi var. Bu, Ukraynaya kiminsə kürəyindən zərbə vuracaq hissidir. Cəbhədən qayıdan şəxslər açıq və ya gizli şəkildə DİN və ordunun yüksək rütbəli zabitlərinin əməliyyatları pis planlaşdırmasından danışırlar. Doğrudur, qeyri-peşəkarlığı xəyanətdən fərqləndirmək çox çətindir. Amma yeni Ukrayna dövləti o qədər də xoş olmayan müharibə aqressiyasının ortasında dünyaya gəlir.