Azərbaycan diplomatı Ankarada döyülməyib.

Bu barədə Axar.az-a Azərbaycanın Türkiyədəki Səfirliyinin Mətbuat Xidmətindən məlumat verilib.

Səfirliyimiz bu gün mediada yayılan məlumatın həqiqəti əks etdirmədiyini bildirib:

"Diplomatımızın döyülməyi ilə bağlı yayılan məlumat yanlışdır və həqiqətlə heç bir əlaqəsi yoxdur".

Qeyd edək ki, bir az öncə "Virtualaz.org" saytında Azərbaycan yüksək rütbəli diplomatı ilə Türkiyə polisi arasında əlbəyaxa dava düşdüyü haqqında məlumat yayılmışdı. Məlumata əsasən, türk nəqliyyat polisi Ankarada patrul xidməti həyata keçirərkən yol hərəkəti qaydalarını kobud şəkildə pozan və ötmə qaydalarına əməl etməyərək qəza vəziyyəti yaradan diplomatik nömrə nişanlı avtomobili saxlayıb. Polis sürücüdən sənədləri tələb edib. Sürücü Azərbaycanın Türkiyədəki səfirliyində diplomat olduğunu bildirib, diplomat olduğunu göstərən sənədləri göstərib. Daha sonra sürücü özünün və avtomobilinin diplomatik immunitetə malik olduğunu bəyan edərək polisin onu saxlamağa ixtiyarının olmadığını deyib və yoluna davam etmək istəyib.

Lakin polislər diplomata bildiriblər ki, yol hərəkəti qaydalarının pozulması barədə protokol yazmadan avtomobili buraxa bilməzlər. Azərbaycanlı diplomat buna qəzəblənib, diplomatik qaydalara görə, özünün və avtomobilinin toxunulmazlığının olduğunu bir daha bildirib və polislərə sərt reaksiya verib. Nəticədə polislə diplomat arasında mübahisə başlayıb, diplomatla polis əlbəyaxa olub.

Sayt hadisədən dərhal sonra Azərbaycanın səfirliyin Türkiyə XİN-i ilə əlaqə yaratdığını bildirib. Türkiyə rəsmiləri isə diplomatdan üzr istəyərək, hadisənin ən xırda detallarına qədər araşdırılacağını deyiblər.