"Şəhid Qaryağdı Əhmədovla olan şəkil N saylı hərbi hissədə əsgərlərə konsert verən zaman çəkilib".

Bu sözləri Axar.az-a sosial şəbəkələrdə şəhid Qaryağdı Əhmədovla çəkdirdiyi şəkli paylaşılan Nisə Qasımova deyib. O, bildirib ki, Ağdamdakı N saylı hərbi hissədə konsert verərkən əsgərlərlə bir-bir, iki-iki çoxlu şəkillər çəkdirib:

"Onlar mənə yaxınlaşaraq sənətimin, səsimin pərəstişkarı olduqlarını bildirirdilər. Elə əsgərlər də olub ki, onlar hərbi xidməti bitirdikdən sonra məni öz toy məclislərinə dəvət ediblər, mən də həmin məclislərdə məmnuniyyətlə iştirak etmişəm. Şəhid Qaryağdı Əhmədovla da şəkil çəkdirdikdən sonrta istədim deyəm ki, inşallah toyunda iştirak edərəm, amma söz boğazımdan qayıtdı."

Əsgərin şəhid olması xəbərini televiziyadan eşitdikdən sonra çox kədərləndiyini deyən müğənni, həmin səhnəni xatırlayaraq çox pis olduğunu bildirdi:

"Elə bil ki, həmin vaxt ürəyimə dammışdı. Televiziyada şəkli görən kimi tanıdım, uzun müddət özümə gələ bilmədim".