Qondarma Luqansk və Donetsk respublikalarının nümayəndələri Minskdə aparılan müzakirələr zamanı öz şərtlərini irəli sürüblər.

Axar.az xəbər verir ki, müzakirələr zamanı qondarma respublikaların nümayəndələri Kiyevi onların xüsusi statuslarını tanımağa çağırıblar.

Əvəzində isə separatçılar Ukraynanın vahid siyasi bütövlüyünü saxlamağa söz veriblər.

Qondarma respublika nümayəndələri anti-terror əməliyyatlarının dayandırılması və siyasi məhbusların azad olunması, azad seçkilərin keçirilməsi və rus dilinə xüsusi status verilməsi tələbini irəli sürüblər. Öz silahlı birləşmələrinin yaradılması və prokuror və hakimlərin özləri tərəfindən təyin olunması da separatçıların irəli sürdükləri təkliflər sırasında olub.

Separatçıların irəli sürdüyü ən maraqlı təklif isə xarici ticarət məsələsində Rusiya və Gömrük İttifaqı ilə münasibətlərin nizama salınmasıdır.

Qeyd edək ki, görüş Rusiyanın Ukraynadakı səfiri Mixail Zurabov, Ukraynanın keçmiş prezidenti Leonid Kuçma, ATƏT-in Ukrayna məsələləri üzrə müşaviri Haydi Talyavini eləcə də, qondarma Donetsk Xalq Respublikasının baş nazirinin müavini Andrey Purqin arasında keçirilib.