"Elmə sərmayə təhsilə nisbətən daha çox ayrılır və nəticədə birtərəfli inkişaf gedir, elmi uğurlar daha çox qazanılır".

Axar.az xəbər verir ki, bunu IV Beynəlxalq Humanitar forumun 2-ci günündə mətbuata açıqlama verərkən BDU-nun rektoru Abel Məhərrəmov deyib. Onun sözlərinə görə, son zamanlar təhsil uğurları elmi uğurlardan geri qalır:

"Azərbaycan artıq humanitar bir məkana çevrilib. Dünənki açılışdan sonra bu gün 8 bölmədə ayrıca dəyirmi masalarda alimlərin çıxışı təşkil edilib. Bunlardan biri də BDU timsalında ali təhsil ocaqlarında təhsil uğurlarının elmi uğurlarla balanslaşdırılması məsələsidir ki, müzakirə edilib. Elmə sərmayə təhsilə nisbətən daha çox ayrılır və nəticədə birtərəfli inkişaf gedir, elmi uğurlar daha çox qazanılır. Son zamanlar təhsil uğurları elmi uğurlardan geri qalır. Burda da əsas olaraq üfüqi və şaquli istiqamətdə müzakirə mövzumuz odur ki, elmlə təhsili paralel necə inkişaf etdirə bilərik?"

Xatırladaq ki, 14 ölkədən 20 nümayəndə, Nobel mükafatı laureatları, universitet rektorları, prorektorlar, akademiya prezidentləri, institut direktorları, akademiklər, professorlar, dosentlər, nazirlər, agentlik sədrləri, şirkət rəhbərləri, media nümayəndələri iştirak etdiyi IV Beynəlxalq Humanitar forumu keçirilir.