"Mənə çox qəribə gəlir..."

Nəqliyyat Nazirliyi müfəttişlərinin özbaşınalıqları, vətəndaşlara qarşı yönələn zorakı əməllərinə qarşı hüquq-mühafizə orqanlarının susqun qalması haqda səslənən iddialara Daxili İşlər Nazirliyindən aydınlıq gətirildi.

DİN-in Mətbuat Xidmətinin rəhbəri Ehsan Zahidov "Axar.az"a açıqlamasında bu məsələlərə yalnız DİN-ə müraciət əsasında baxıla biləcəyini qeyd etdi:

"Kimə qarşı zorakılıq hərəkəti, döyülmə faktı varsa, müraciət etsin, araşdıraq. Mətbuatın yazması başqa məsələdir, amma konkret zərərçəkən vətəndaş özünü döyülmüş, zorakılığa məruz qalmış hesab edirsə, hüquq-mühafizə orqanlarına müraciət etməlidir və məsələ qanuni şəkildə araşdırılıb, hüquqi qiymətini almalıdır.

Mənə qəribə gəlir ki, videolarda, fotolarda göstərilir, bəs, axı vətəndaş niyə hüquq-mühafizə orqanlarına müraciət eləmir? Həqiqətən vətəndaş ona qarşı hər hansı bir təzyiqlə rastlaşıbsa, özünü zərərçəkmiş hesab edirsə, müraciət etsin. Tək bunlar deyil ki! Gün ərzində DİN-ə yüzlərlə müraciət daxil olur. Buna görə qorxub çəkinmək lazım deyil".