Bakıda rəhbərləri Qaraçuxur məscidini yandıran "Yekbun" təşkilatı dağılıb.

Axar.az-a verilən məlumata görə, PKK-nın Azərbaycandakı qanadı olan qeyri-leqal qruplaşma üzvləri fəaliyyətini dondurub və tədbirlərin təşkilinə son qoyulub.

Təşkilatın Feysbukda təsis edilən rəsmi səhifəsi də qapadılıb və admini hazırda həbsdə olan Elnur Ələkbərovdan sonra PKK simpatizanı olan gənclər dağılışmağa qərar veriblər. Onların bir neçəsi istintaqa dəvət olunub və ifadəsi alınıb.

Qaraçuxur məscidini yandıranların ölkəmizdəki İraq səfirliyi qarşısında etiraz aksiyaları keçirmək planı da olub. Onlar bu aksiyalarda qarışıqlıq salmağı nəzərdə tutublar. Bununla həm diqqəti İŞİD probleminə yönəltmək, həm də məsciddə xəvariclərin olduğuna işarə vermək istəyiblər.

Xatırladaq ki, Milli Təhlükəsizlik Nazirliyi tərəfindən keçirilmiş anti-terror tədbirləri nəticəsində Bakı şəhəri, Binəqədi rayonunun Biləcəri qəsəbəsində həmin cinayəti törətməkdə şübhəli bilinən Azərbaycan Respublikasının vətəndaşları - Nəsibov Namiq Kamil oğlu və Ələkbərov Elnur Tahir oğlu saxlanılıblar.

Namiq Nəsibovun üzərindən "Makarov" tipli tapança və 8 ədəd 9 mm çaplı patron, Elnur Ələkbərovun isə üzərindən "Smit-Vesson" markalı revolver aşkar edilərək götürülüb.

Müəyyən edilib ki, Namiq Nəsibov 2014-cü ilin avqust-sentyabr aylarında PKK terrorçu təşkilatının nəzarətində olan Suriya Ərəb Respublikasının ərazilərinə gedərək oradakı döyüşlərdə iştirak edib.