"Bəzi özəl televiziya və radio kanalları gəncləri işğal altında olan torpaqların təəssübünü çəkməyə yox, barlara çağırır".

Bunu Müdafiə Nazirliyinin Mənəvi-psixoloji hazırlıq və ictimaiyyətlə əlaqələr idarəsinin rəisi, polkovnik Rüfət Əmirov deyib.Onun sözlərinə görə, əsgərlərin hərbi xidmətlə bağlı məruz qaldıqları ən amansız psixoloji təsir mülki həyatdan və KİV-lərin ordu həyatı, hərbi xidmət barədə yaydıqları yalanlardan irəli gəlir.

Bir sıra hallarda bəzi qüvvələrin ordu ilə cəmiyyət arasında uçurum yaratmaq, ordunun imicini ləkələmək üçün çalışdıqlarını qeyd edən nazirlik rəsmisi özəl TV və radio kanallarını tənqid edib:

"Bəzi özəl televiziya və radio kanalları gəncləri işğal altında olan torpaqların təəssübünü çəkməyə yox, restoranlara, barlara çağırır. Mənasız, bayağı şoular təşkil edərək kosmopolit düşüncə və əxlaq tərzini təbliğ edirlər".

Bu açıqlama zaman-zaman medianın insanları yanlış yönləndirməsi ilə bağlı aparılan söhbətləri möhkəmləndirdi. "Öncə toyuq yaranıb, yoxsa cücə" polemikasında olduğu kimi, burada da müzakirə haçalanıb. Belə ki, ölkədə vətənpərvərlik ruhunun olmadığını deyən telekanallar reytinq və reklam qazanmaq üçün çarəni daha çox əyləncə verilişlərində görürlər. Ona görə də günün istənilən saatında kanallarda evləndirmə, yemək, əyləncə, ailə-məişət xarakterli verilişlər, tok-şoular seyr etmək mümkündür. Bu verilişlərə baxa-baxa etiraz edənlər də az deyil. İnsanlarımızda imtina mədəniyyətinin olmaması çox zaman kanallara bu cür "əl-qol atmağa" imkan verir.

Bəs nazirlik nümayəndəsinin dediklərində bir həqiqət varmı? Həqiqətən də gənclərin əhvalının, dünyagörüşünün pozulmasında, daha dəqiq desək, onların barlara yönləndirilməsində kanallar müstəsna rol oynayır?

Yeni Müsavat ənənəvi olaraq bu mövzu ilə bağlı sorğu keçirmək üçün telekanallara müraciət etsə də, suallarımıza cavab verən tapılmadı. Və bu, artıq dəfələrlə təkrarlanır. Telekanallarda həmkarlarının - çap mediasının suallarını cavablayacaq adekvat şəxs ya olmur, ya da olsa belə cavab vermək istəyən tapılmır.

Media eksperti Zeynal Məmmədli isə bizə açıqlamasında bildirdi ki, əgər cəmiyyətdə vətənpərvərlik axını varsa, media bunu təqdim etməlidir. Onun sözlərinə görə, mass-medianın missiyası cəmiyyətdə baş verənləri işıqlandırmaqdır: "Əks halda, təbliğat vasitəsinə çevrilərlər ki, bu da onların missiyasına uyğun deyil.

O qurumlar vətənpərvərliyin təbliğatı ilə ciddi, yaradıcı şəkildə məşğul olmalıdılar. Bunu niyə bizdən umurlar ki? Özləri işıqlandırsınlar, media da bunu məlumat kimi yaysın. Məsələnin kökündə medianın azadlığı, sərbəstliyi dayanır. Bunlar olmayanda hansısa aparıcı verilişində vətən sevgisini ön plana çəkə də bilər. Amma bu şəkildə vətənpərvərlik də sünidir".

Bununla yanaşı, Z.Məmmədli hesab edir ki, Müdafiə Nazirliyi rəsmisinin "bəzi özəl televiziya və radio kanalları gəncləri işğal altında olan torpaqların təəssübünü çəkməyə yox, barlara çağırır" sözlərində həqiqət var. Müsahibimiz bunu bir jurnalist kimi yox, onunla empati quran bir şəxs kimi dediyini vurğuladı: "Özümü onun yerinə qoyuram. Görürəm ki, hər gün efirdə toy-bayram, "beş günlük dünyadı, yaşa, maşın al, ev al, yaşa" əhvalı var. Bu günah güzgünün günahı deyil ki. Orda həyat əks olunur. Sadəcə olaraq, güzgünü yox, özünü dəyişməlisən".