Fevralın 10-da Ermənistanın iki diversiya-kəşfiyyat qrupunun Azərbaycan Ordusu tərəfindən məhv edilməsi faktını gizlətmək üçün İrəvan öz zabitini həbs edib.

Axar.az erməni mediasına istinadla xəbər verir ki, baş leytenant Tiqran Simonyanın öldürülməsi faktı üzrə aparılan istintaq araşdırmaları çərçivəsində baş leytenant Taron Qedeonyan məsuliyyətə cəlb olunub. O, hərbi növbətçilik qaydasını pozmaqda və nəticədə Simonyanın ölümünə şərait yaratmaqda günahlandırılır.

Xatırladaq ki, fevralın 10-da Ermənistan ordusunun təşkil etdiyi 2 kəşfiyyat-təxribat qrupunun qarşısı qətiyyətlə alınıb. Təxribat zamanı Ermənistan tərəfinin xüsusi təyinatlı dəstəsinin komandiri, zabit Tiqran Simonyan da daxil olmaqla bir neçə əsgəri məhv edilib. Düşmən tərəfdən xeyli sayda yaralı var. Azərbaycan Ordusunun heç bir itki vermədən düşmənin iki diversiya qrupunu məhv etməsi Ermənistan ictimaiyyətində təlaş yaradıb.

Helsinki Vətəndaş Assambleyasının Vanadzor ofisi T.Simonyanın ölümü ilə bağlı ailəsinə heç bir məlumat verilmədiyini bildirib, ölən hərbçilər barədə xəbərin və onların meyitlərinin ictimaiyyətdən gizlədilməsindən narahatlıq ifadə edən bəyanat yayıb.