"ABŞ hazırda Azərbaycana enerji bazarında Rusiyanın potensial rəqibi kimi baxır".

Bu sözləri Axar.az-a açıqlamasında rusiyalı politoloq Konstantin Kalaçev söyləyib.

O, Rusiyanın Azərbaycanla heç vaxt müttəfiq ola bilməyəcəyini söyləyib:

"ABŞ-ı üç məsələ narahat edir. Bunlar İŞİD, Ukraynadakı böhran və Rusiyadır. Moskvanın Ermənistan və Azərbaycana lazımi səviyyədə təsir imkanlarının olması Rusiyanın Qarabağ problemində iştirakını təmin edib. Rusiyanın Avropaya təsiri enerji daşınmasının həyata keçirilməsindən asılıdır. Aydındır ki, Nulland Bakıda Dağlıq Qarabağ konflikti istiqamətində ədalətli və daimi həll variantlarını müzakirə edəcək. Qafqaz səfəri zamanı Nulland Ermənistana da yollanacaq. O, burada Ermənistanla siyasi, iqtisadi əlaqələrin inkişafı, eləcə də Dağlıq Qarabağ konfliktini müzakirə edəcək. Yəqin ki, burada məsələ əvvəllər Dağlıq Qarabağ Muxtar Vilayətinin tərkibinə daxil olmayan rayonlarla bağlı söhbət olacaq. Ümumiyyətlə, bu ərazilərin işğal olunması ilə bağlı heç bir şübhə yoxdur. ABŞ hazırda Azərbaycana enerji bazarında Rusiyanın potensial rəqibi kimi baxır. Ona görə ki, ABŞ ilk növbədə "Cənub Qaz Dəhlizi"ni dəstəkləyir. Bu isə Avropa Birliyi üçün prioritet enerji proyekti hesab olunur. Həmin layihə Avropa Birliyinin enerji təhlükəsizliyini təmin etməlidir. ABŞ-ı Bakı ilə Moskvanın yaxınlaşması narahat edir. Amma bilinən tək bir şey var - o da ki, Bakının heç vaxt Rusiyanın müttəfiqi olmayacağıdır. Böhran vədəsində isə Moskva yalnız Ermənistanı seçəcək. ABŞ da oyunu məhz bunun üzərində qurmağa çalışır. Rusiya Azərbaycanın Avropa Şurasındakı səsvermə zamanı ortaya qoyduğu mövqeni müsbət qəbul edib. Kreml hörmət əlaməti olaraq Bakıya bunun qarşılığını istənilən formada verə bilər. Bunların içərisində yalnız bir məqam istisnadır. O da Moskvanın İrəvanla ittifaqdan imtina etməsi məsələsidir".