Azərbaycan-Ermənistan sərhədindəki vəziyyətin həlli ilə bağlı mayın 13-də başlayan danışıqlar bu gün Qarabağdakı Rusiya sülhməramlı kontingentinin komandiri Rüstəm Muradovun iştirakı ilə davam edir.

Axar.az Hit.az-a istinadən xəbər verir ki, bu barədə Gorus icma rəhbərinin müavini Menua Ovsepyan məlumat verib.

Onun sözlərinə görə, Ermənistan tərəfdən danışıqlarda Baş Qərargahın və ilk ordu korpusunun nümayəndələri iştirak edirlər.

“Danışıqlar təyin olunmuş vaxtda davam etdirildi. Rusiya tərəfdən görüşlərdə Qarabağdakı Rusiya sülhməramlı kontingentinin komandiri Rüstəm Muradov iştirak edir”, - Ovsepyan vurğulayıb.

Menua Ovsepyan sərhəddə vəziyyətin dəyişməz olaraq qaldığını da sözlərinə əlavə edib.

Qeyd edək ki, Azərbaycan XİN bu gün daha bir açıqlama yayaraq Ermənistanla sərhəd olan Azərbaycanın azad edilmiş bölgələrində hava şəraitinin mülayimləşməsi ilə əlaqədar, Azərbaycanın özünün ərazi bütövlüyü çərçivəsində həyata keçirilən sərhəd mühafizə sisteminin gücləndirilməsi işini davam etdirdiyini, bu prosesin Ermənistanla Azərbaycan arasındakı sərhəd xəttini təyin edən, tərəflərin hər birində olan xəritələr əsasında həyata keçirildiyini bildirib.