Bu gün Avropa Şurası Parlament Assambleyasının (AŞPA) yay sessiyasının ilk günündə Avropa Şurası Nazirlər Komitəsinə (AŞNK) sədrlik edən Bosniya-Hersoqovinanın xarici işlər naziri İqor Crnadak çıxış edərək komitənin fəaliyyəti barədə Assambleya üzvlərinə hesabat verib və avropalı parlamentarların suallarını cavablandırıb.

Axar.az xəbər verir ki, millət vəkili Qənirə Paşayeva AŞPA Nazirlər Komitəsi sədrini Avropa Məhkəməsinin azərbaycanlı köçkünlərlə bağlı qərarının yerinə yetirilməsi üçün Ermənistana təzyiqə çağırıb.

O, xüsusilə iyunun 16-da Avropa Məhkəməsinin Böyük Palatasının "Çıraqov və başqaları Ermənistana qarşı" adlı şikayət ərizəsi üzrə qərar çıxarılmasına diqqət çəkib.

AŞPA Nazirlər Komitəsi sədri İqor Crnadak AŞNK-nin prosedur qaydaları üzrə AİHM-nin bu qərarlarının da icrasına nəzarət edəcəyini bildirib.

"Bu işlər Dağlıq Qarabağ münaqişəsi zamanı qaçqın və məcburi köçkün düşmüş insanların şəxsi əmlakı ilə əlaqədardır. Məhkəmə də bu şikayətçilərə qarşı Avropa İnsan Haqları Konvensiyasının pozulduğunu bildirərək, məsələnin məhkəmə yolu ilə həll edilməsi üçün qərarlar verib ki, hər ölkə qaçqın və məcburi köçkünlərin əmlakı ilə bağlı xüsusi mexanizmlər işləyib hazırlasın. Nazirlər Komitəsi isə öz növbəsində təbii ki, məhkəmə qərarlarının icra edilməsi istiqamətində öz nəzarət fəaliyyətini aparacaq. Əlbəttə, bizim sədrliyimiz də məsələnin nəzarətinə xüsusi diqqət ayıracaq".