Zəngəzur dəhlizi əslində regionda yerləşən bütün ölkələrin iqtisadiyyatına, o cümlədən Ermənistanın özünə xeyir gətirəcək. Beləliklə, Ermənistan blokadadan çıxır və digər ölkələr bir-biri ilə daha sıx əlaqə yaratmaq imkanı qazanmış olurlar.

Bu sözləri Axar.az-a politoloq İlqar Vəlizadə Zəngəzur dəhlizinin əhəmiyyətindən danışarkən deyib.

“Məsələn, Türkiyə Rusiya, o cümlədən Azərbaycan və İranla dəmir yolu vasitəsilə rabitəsini yaradır. İran Rusiya ilə birbaşa dəmiryol xətti ilə birləşir. Eyni zamanda İranla Ermənistan, Mərkəzi Asiya ölkələri ilə Yaxın Şərq ölkələrinin arasında rabitələr yaradır. Bu rabitələrin möhkəmlənməsində Zəngəzur dəhlizi müstəsna rol oynayır. Təəssüflər olsun ki, Ermənistan rəhbərliyi bunu başa düşmür. Hələ də bizimlə oyun oynayır. Başa düşmürlər ki, Zəngəzur dəhlizi nəinki Azərbaycanın, eyni zamanda sadaladığımız ölkələrin maraqlarını təmin edir. Bu səbəbdən düşünürəm ki, Zəngəzur dəhlizinin açılması üçün müəyyən birgə təzyiqlər olmalıdır”, - politoloq qeyd edib.