Deputatlığa namizədlərin imza vərəqələrinin seçki dairələrinə təqdim olunması sentyabrın 12-dən başlanacaq.

Bunu Axar.az-a YAP icra katibinin müavini, deputat Siyavuş Novruzov deyib. Onun sözlərinə görə, imza vərəqələrinin təhvil verilməsinə hələ zaman var və bu prosesdə heç kəs gecikmir.

YAP rəsmisi qeyd edib ki, seçki qanunvericiliyinə görə, namizəd olmaq istəyən istənilən şəxsin oktyabrın 2-nə qədər imza vərəqələrini dairələrə təqdim etmək imkanı var: "Ona görə də gecikmədən söhbət gedə bilməz, zaman kifayət qədər böyükdür" .

S.Novruzov YAP-ın seçkilərə iştirak edəcək namizəd siyahısının yaxın vaxtlarda açıqlanacağını söyləyib. Amma millət vəkili növbəti dəfə konkret zamanı söyləməkdən imtina edib.

Onun fikrincə, siyahının açıqlanmasında hər hansı yubanma yoxdur: "Hər bir proses öz axarı ilə gedir və siyahının əvəlkindən fərqli olub-olmadığını açıqlqnanda görəcəksiniz".

Qeyd edək ki, parlament seçkiləri noyabrın 1-də keçiriləcək.