Avropa Parlamentinin tənqidi qətnaməsindən dolayı rəsmi Bakı Avropa Birliyini "Şərq tərəfdaşlığı" proqramından çıxmaqla hədələyir. Azərbaycanın Avropa Birliyindən uzaqlaşması isə Rusiyaya faydalıdır. Bu, yaranmış diplomatik boşluğu doldurmağa hazır olan Kremlə iki xarici siyasət məqsədinə nail olmağa imkan verəcək.

Axar.az xəbər verir ki, bu barədə analitik məqalə Almaniyanın "Deutche Welle" jurnalında yer alıb. Jurnal yazır ki, bu məqsədlərdən biri tərəflərin "Krım presedentindən" öz xeyrinə istifadə etməkdə maraqlı olduqları üçün dondurulmuş vəziyyətdən çıxmaq təhlükəsi ilə üzləşmiş Qarabağ münaqişəsinin "qızışmasına" yol verməməkdir:

"Bakı və İrəvan Krımın Rusiya tərəfindən ilhaqını müxtəlif şəkildə şərh ediblər. İrəvanda Qarabağın Azərbaycanın işğal olunmuş rayonları ilə birgə hazırkı sərhədləri çərçivəsində tanınması imkanı barədə danışırlar. Bakıda isə Krımda öz keçmiş ərazilərinin silah yolu ilə qaytarılması presedentini görüblər. Azərbaycanın ictimai rəyi, yerli mətbuatını təhlil etsək, bu fikrə gəlmək olar, "kiçik qalibiyyət müharibəsinə" hazırdır. Sovet dövrünün heç bir inzibati sərhədləri ilə üst-üstə düşməyən və yalnız atəşkəs bağlanıldığı məqamda tərəflərin hərbi vəziyyətini əks etdirən təmas xəttində hər gün yüzədək atışma olur. Lakin Qafqazda genişmiqyaslı müharibə bu gün Moskvanın maraqlarına cavab vermir. Kremlin Ermənistan və Azərbaycanda kəskin artan diplomatik fəallığı məhz bununla izah olunur".

Moskvanın ikinci məqsədinin Azərbaycan ərazisi və hava məkanından Suriyaya tranzitə (belə bir tələbat yaranarsa) zəmanət almaq olduğunu qeyd edən jurnal yazır ki, Suriya əməliyyatı tədricən Rusiyanın əsas hərbi-siyasi şanslarından birinə çevrilir və onu maksimal dərəcədə iflasa uğramaqdan qorumaq lazımdır:

"Buna görə də Kreml Azərbaycanın Avropa İttifaqı ilə mübahisəsindən mümkün qədər aktiv istifadə etməklə, Bakını öz təsir dairəsinə qaytarmağa ümid bəsləyir. Qarabağ münaqişəsinin dinc nizamlanması planının təklif olunması Rusiya üçün bu işdə ideal alətdir. Rusiya Ermənistan Prezidenti Serj Sərkisyanın sentyabrın ortalarında Moskvaya səfəri zamanı ona hansı kompromis həll variantını təklif edə bilərdi? Böyük ehtimalla, son illər resept o qədər də çox dəyişməyib. Söhbət "Qarabağ tərəfinin işğal etdiyi" Azərbaycan rayonlarının qaytarılmasından gedir. Lakin hamısının yox, yalnız beşinin, özü də tədricən. İki rayonu isə Ermənistan daha ciddi zəmanət olmadan qaytarmaqdan imtina edəcək, çünki bu rayonlar Ermənistan və qondarma Dağlıq Qarabağ arasında bir "körpüdür". Bəs əvəzində nə olacaq? Birbaşa və dolayısı kompensasiya, Rusiyadan yeni hərbi zəmanətlər. Ola bilsin, bir variant kimi, təkcə Ermənistan deyil, Azərbaycanda da Rusiya bazalarının yaradılması ilə əlaqədar çətin bir sxemin həyata keçirilsin - məsələn, Suriyaya yüklərin daşınması üçün tranzit məntəqə şəklində. Moskvada hadisələrin belə inkişafından çox şad olardılar, çünki bu, bütün Cənubi Qafqazı onun nəzarətinə keçirməklə yanaşı, həm də onu Suriya əməliyyatı üçün ideal bazaya çevirərdi. Digər tərəfdən, ABŞ tərəfindən sərt müqavimətlə qarşılaşmamaq üçün Azərbaycanda baza yaradılmasını yalnız bu bəhanə altında təklif etmək olardı. Kreml üçün bu plan demək olar ki, ideal bir həll olardı. Qarabağda münaqişə yenidən dondurulur, lakin həll olunmur, regionda iştirak güclənir, Ermənistana və Azərbaycana təsir imkanları artır. Bu sxemdə minus tapmaq isə demək olar ki, mümkün deyil. Beləliklə, həm torpaqların bir hissəsinin azad olunmasını izah etməli olacaq, həm də Ermənistan və Qarabağın hazırkı rəhbərliyi, eləcə də Azərbaycan rəhbərliyi üçün əlavə problemlər yaradacaq. Kreml isə yalnız qazanan tərəf olacaq", - jurnal yazır.