Azərbaycanın Suriya böhranı üzrə düşünülmüş mövqeyi onun bu prosesə cəlb olunmasına imkan verməyəcək.

Axar.az xəbər verir ki, bu barədə Baku Netvorkun Ekspert Şurasının rəhbəri, fəlsəfə doktoru Elxan Ələsgərov deyib.

Onun sözlərinə görə, Azərbaycan Suriya münaqişəsinə cəlb edilmiş ölkələrlə - Rusiya, İran və Türkiyə ilə həmsərhəd olması ciddi məsələdir:

"Belə vəziyyətdə Azərbaycanın mövqeyi bu ölkələr üçün böyük əhəmiyyətə malikdir. Azərbaycanın Suriya böhranı üzrə düşünülmüş mövqeyi onun bu prosesə cəlb olunmasına imkan verməyəcək. Biz beynəlxalq terrorizmlə mübarizənin acı təcrübələrinə malikik. Azərbaycanın müstəqilliyinin formalaşdığı ilk dövrləri boyu və Dağlıq Qarabağın Ermənistan tərəfindən işğalı azərbaycanlılara qarşı terrorizmlə və soyqırımla müşayiət olunurdu. Amma ən maraqlısı odur ki, Azərbaycanın dinc əhalisinə qarşı öz qanlı əməllərini həyata keçirmiş terrorçuların əksəriyyəti Ermənistan erməniləri deyildilər. Doğrudur, terrorçular Azərbaycanı sındırmağa nail ola bilmədilər, lakin beynəlxalq cəmiyyətin erməni terrorizmi probleminə laqeyd qalmasını yaxşı xatırlayırıq".