Türkiyənin "Sabah" qəzeti Rusiya prezidenti Vladimir Putinin yaxın dostlarından olan, azərbaycanlı iş adamı, professor İlham Rəhimovun açıqlamasını yayıb.

Musavat.com xəbər verir ki, sözügedən yazıda İ.Rəhimov V.Putinin Rusiya-Türkiyə münasibətlərinin inkişafı üçün bütün gücünü səfərbər etdiyini bildirib.

Professor müsahibəsində bildirib ki, təyyarə böhranına görə ikitərəfli münasibətlərin pisləşməsindən dərin üzüntü keçirib: "Hörmətli Putin 15 il əvvəl, iqtidara gəldiyi gündən etibarən Rusiya-Türkiyə münasibətlərinin yaxşılaşması və inkişafı üçün bütün sahələrdə ən çox güc sərf edənlərdən biri idi. Öncə rəsmi qurumlar arasındakı münasibətlərdən danışıram. V.Putinin Rusiya-Türkiyə münasibətlərinə nə qədər əhəmiyyət verdiyinə şahidəm. Ona görə də, V.Putinin Rusiya təyyarəsinin vurulmasından sonra nə qədər dərin xəyal qırıqlığı yaşadığını anlayıram".

Məqalədə qeyd edilib ki, azərbaycanlı İ.Rəhimov 1970-ci illərdə V.Putinlə birlikdə Leninqrad Dövlət Universitetinin hüquq fakültəsində təhsil alıb və dostluqları həmin illərdən etibarən başlayıb.