Rusiyanın "Birinci kanalı" yenidən Azərbaycana qarşı qara piara başlayıb.

Axar.az xəbər verir ki, rus televiziyası Azərbaycana qarşı tutduğu sərt mövqeyini bu dəfə "Politika" verlişində nümayiş etdirib. Azərbaycanı Türkiyə ilə əməkdaşlıqda və Qarabağda əməliyyatlara başlamaqda günahlandıran jurnalist və ekspertlər müxtəlif yollarla İrəvanın mövqeyini müdafiə etməyə çalışıblar. Hətta ekspertlərdən bəziləri guya Dağlıq Qarabağın kürd ərazisi olduğunu da bildirib.

Verilişdə Azərbaycan və Türkiyənin mövqeyini jurnalist Fuad Abbasov müdafiə edib. Onun Azərbaycanın ərazi bütövlüyü ilə bağlı dediyi sözlər aparıcının etirazına səbəb olub. O, Fuad Abbasova "Siz əgər Azərbaycanı müdafiə edirsinizsə, biz sizi eşitmək istəmirik" deyib. Azərbaycana qarşı xüsusilə sərt mövqe nümayiş etdirənlər sırasında aparıcı Pyotr Tolstoy, ekspert Sergey Kurqinyan, Semyon Baqdasarov və deputat Konstantin Zatulin olublar.

Qeyd edək ki, Ermənistanın Azərbaycana qarşı təxribata başladığı və sərt şəkildə cəzalandığı 2 apreldən bu yana Rusiya KİV-i Azərbaycan əleyhinə heç bir sədd tanımadan, açıq-aşkar anti-təbliğat aparıb.