Doha görüşü, əslində, bir daha "neft bumu dövrünə" qayıtmağın çətin olacağına və hətta mümkünsüzlüyünə işarə idi.

Axar.az xəbər verir ki, bu haqda iqtisadçı alim Vüqar Bayramov açıqlama verib. Ekspert Doha görüşündəki nəticəsizliyin bazara dərhal təsir etdiyini qeyd edib:

"OPEK-in Dohada razılığa gələ bilməməsinə birja qısa zamanda reaksiya verdi. Neftin qiyməti ilk birja günündə 5 faizə yaxın aşağı düşdü. Beynəlxalq analtiklər qiymət azalmalarının davam edəcəyini proqnozlaşdırırlar. Neftin qiymətinin yenidən yüksələcəyi ilə bağlı bir sıra neft ölkələrində formalaşan ümidlər dəfn olundu. Belə görünür ki, OPEK və digər aparıcı istehsalçılar oktyabradək hasilatın dondurulması məsələsini gündəmdən çıxartdılar. Doha görüşü, əslində, bir daha "neft bumu dövrünə" qayıtmağın çətin olacağına və hətta mümkünsüzlüyünə işarə idi".

İqtisadçının sözlərinə görə, Doha görüşü Azərbaycan üçün əhəmiyyətli idi:

"Neftin dünya bazar qiymətindəki aşağı düşmələr ölkəyə daxil olan valyutanın azalmasına səbəb olur. Valyuta daxilolmalarını artırmağın yeganə yolu islahatların sürətləndirilməsidir. Struktur islahatları, liberallaşma və geniş miqyaslı elektronlaşma qeyri-neft sektorunun inkişafını stimullaşdıra bilər. Artıq bütün neft ölkələri qara qızılın qiymətində daha kəskin azalmalara hazır olmalıdırlar. Bu hazırlıq isə yeni iqtisadi islahatlar paketindən keçir".

Qeyd edək ki, dünən neft ölkələrinin Dohada keçirilən görüşü nəticəsiz başa çatıb. Növbəti görüş iyunda Vyanada keçiriləcək.