Azərbaycan Cənubi Qafqazda Qərbin təzyiqlərinə ən çox müqavimət göstərən dövlət oldu. Bu, bir sıra amillərin birləşməsinin nəticəsidir.

Axar.az xəbər verir ki, bunu rusiyalı politoloq Mixail Belyayev “Moskva-Bakı”ya müsahibəsində deyib.

“Bu gün Azərbaycanı Cənubi Qafqazın əsas dayaq nöqtəsi adlandırmaq olar. O, başqalarına, yeri gəlmişkən, təkcə regionda deyil, dövlət üçün müsbət nəticə verən səmərəli siyasətin necə aparılmasını nümunə göstərir. Neft hasilatı kimi Azərbaycanın böyük kozırı var. Bir iqtisadçı kimi deyim ki, bu, ölkə hakimiyyətinin indi sarsılmaz siyasətini qura bildiyi əsasdır. Azərbaycan Şərqlə Qərbin qovşağında yerləşir, onun nəqliyyat və logistika baxımından əsas əhəmiyyətini dərk edir. Azərbaycan nə etmək, kiminlə müttəfiq olmaq, çağırışları qabaqcadan görmək, düzgün strategiya qurmaq və onlara necə müqavimət göstərmək lazım olduğunu incə şəkildə hiss edir”, - o bildirib.

Belyayev qeyd edib ki, ümumilikdə əlində olan bütün kozırlardan məqsədəuyğun istifadə, rəhbərliyin müdrik yanaşması, siyasi iradə və s. Bakıya Qərbin təzyiq və çağırışlarına müqavimət göstərməyə imkan verir:

“Güclü iqtisadiyyat, güclü dövlət quruculuğu, güclü ordu olmasaydı, Azərbaycan öz ərazilərini geri qaytara bilməzdi. Bunlar hamısı bir-birindən asılı olan amillərdir. Buna əsaslanaraq, bu gün Azərbaycan həqiqətən də suveren dövlət kimi yalnız öz milli maraqlarına əməl etmək, Qərbi açıq şəkildə tənqid etmək, həmçinin daha ədalətli çoxqütblü dünyanın qurulmasında fəal iştirak etmək imkanına malikdir. Artıq Azərbaycanın nöqteyi-nəzəri, səsi dünyada eşidilir və ciddi qəbul edilir. Bakının bugünkü siyasəti Azərbaycanın beynəlxalq aləmdə nüfuzlu dövlət olmasına layiqdir. Bu, digər ölkələr üçün nümunədir. Hətta bəzi Qərb dövlətləri də Azərbaycanı nümunə gətirirlər”.