Azərbaycanın Nəqliyyat Nazirliyində Rusiyanın Nəqliyyat naziri Maksim Sokolovun rəhbərlik etdiyi nümayəndə heyəti ilə görüş keçirilib.

Axar.az Nəqliyyat Nazirliyinin saytına istinadən məlumat verir ki, nümayəndə heyətini qəbul edən Nəqliyyat naziri Ziya Məmmədov Azərbaycanda son illər ərzində nəqliyyat-yol kompleksində görülmüş işlər barədə rusiyalı həmkarına ətraflı məlumat verib. Görüş zamanı Azərbaycan - Rusiya dövlət sərhədindən Samur (Azərbaycan Respublikası) - Yaraq-Qazmalar (Rusiya Federasiyası) buraxılış məntəqələri ərazisində Samur çayı üzərindən avtomobil körpüsünün tikintisi barədə müzakirələr aparılıb. Bu körpününü Azərbaycan və Rusiya arasında beynəlxalq avtomobil daşımalarını təmin edən nəqliyyat sisteminin əsas halqası olduğu vurğulanıb və qeyd edilib ki, yeni körpü keçidi iki ölkə arasında avtomobil daşımalarının asanlaşmasına, məntəqənin buraxılış qabiliyyətinin, eləcə də yükdaşımaların həcminin artmasına xidmət göstərəcək.

Görüşdə, həmçinin Rusiya ilə Azərbaycan arasında nəqliyyat əlaqələrinin mövcud vəziyyəti, dəniz limanları və avtomobil nəqliyyatı sahəsində əməkdaşlığın perspektivləri, həmçinin ikitərəfli əlaqələrin digər aspektləri və bu əməkdaşlığın daha da inkişaf etdirilməsi yolları ətrafında fikir mübadiləsi aparılıb.

Görüşün sonunda Rusiyanın Nəqliyyat naziri M.Sokolov nazir Z.Məmmədova "Rusiya Federasiyasının fəxri dəmiryolçusu" döş nişanını təqdim edib.