Ermənistanda kilsə ilə hökumət arasında münasibətlərdə gərginlik son zamanlar daha da dərinləşib. Müxalifət bu qarşıdurmada açıq şəkildə kilsəni və onun rəhbəri II Qaregeni dəstəkləyir. Müxalifət mediası isə Baş nazir Nikol Paşinyanın kilsəyə qarşı ritorikasının Azərbaycan ruhani lideri, Qafqaz Müsəlmanları İdarəsinin sədri Şeyxülislam Allahşükür Paşazadənin mövqeyi ilə oxşarlıq təşkil etdiyini iddia edir. Bildirilir ki, Paşinyanın erməni kilsəsinə yönəlmiş tənqidləri Paşazadənin üslubuna bənzəyir. Bu səbəbdən media bu məsələləri bir-birinə bağlayaraq baş naziri sərt şəkildə tənqid edir və onu aşağılamağa çalışır.

Bu fikirləri Axar.az-a açıqlamasında politoloq Zeynal Əmirəliyev bildirib.

Politoloqun sözlərinə görə, bu yanaşma Ermənistan cəmiyyətində kök salmış ksenofobiyanın göstəricisidir:

“Bu fakt bir daha sübut edir ki, Ermənistan cəmiyyətində təkcə millətçilik deyil, dini zəmində də düşmənçilik mövcuddur. Müsəlmanlara qarşı aqressiya açıq hiss olunur. Azərbaycan din xadiminin hədəf seçilməsi təsadüfi deyil. Bu, Ermənistandakı revanşist qüvvələrin həm milli, həm də dini baxımdan düşmənçilik münasibətini ortaya qoyur”.