Ana səhifə Hadisə |
11:11
Gürcüstan Aşıqlar Birliyinin sədri, şair-publisist Dərviş Osman Əhmədoğlu vəfat edib.
Kult.az xəbər verir ki, bu barədə şair Əkbər Qoşalı qeyd edib.
O bildirib ki, D.Osman bu gün səhər saatlarında dünyasını dəyişib.
“Zəlimxan Yaqub ona “Borçalının sultanı” deyə müraciət edərdi”, - Ə.Qoşalı bildirib.
Qeyd edək ki, Osman Əhmədoğlu 1948-ci ildə Marneuli rayonunun Keşəli kəndində anadan olub. Doğma kəndində 8 illik, qonşu Kəpənəkçi kəndində isə orta məktəbi bitirib. 1974-cü ildə Azərbaycan Dövlət Universitetinin Filologiya fakültəsini bitirib. O, hələ orta məktəbdə oxuduğu illərdə şeir yazıb. Tələbəlik illərində mətbuatda publisistik məqalələrlə çıxış edib. O.Əhmədoğlunun “Borçalıda ocaq yanır” adlı ilk şeirlər kitabı 1989-cu ildə Bakıda “Yazıçı” nəşriyyatında işıq üzü görüb. O, Azərbaycan Yazıçılar Birliyinin üzvü idi. Bədii yaradıcılıqla bərabər, dövrü mətbuatda publisistik məqalələrlə çıxış edib.
Şair-publisist vaxtilə Gürcüstanda nəşr olunan “Yeni Yol” qəzetində redaktor müavini vəzifəsində çalışıb. Bir müddət sonra o, “Dədə Qorqud” adlı dərgiyə rəhbərlik edib. Dərviş Osman “Meydan” dərgisinin idarə heyətinin fəal üzvlərindən biri olub. Şeirlər kitablarından əlavə Azərbaycan folkloruna həsr olunan iki kitabı çap olunub. O.Əhmədoğlu Gürcüstanda aşıq yaradıcılığının yaşadılmasında və inkişafında böyük xidmətlər göstərib. Onun təşkilatçılığı ilə əslən Gürcüstandan olan azərbaycanlı ziyalıların xatirəsinə həsr olunan bir sıra tədbirlər keçirilib.
Tanrı ruhunu şad etsin!
Tarix
2020.03.18 / 14:25
|
Müəllif
Aqşin
|