Fernandu Santuşun göndərilməsi çox düzgün, amma gecikmiş qərardır. Onu ilin əvvəlində göndərmək lazım idi. Hər halda federasiya rəhbərliyinin öz məşqçisinə etimad göstərməsi, onun arxasında dayanması normal haldır.

Bu sözləri Axar.az-a açıqlamasında idman eksperti Kənan Məstəliyev Azərbaycan millisinin baş məşqçisi Fernandu Santuşun müqaviləsinə xitam verilməsi ilə bağlı danışarkən deyib.

Ekspert qeyd edib ki, Santuşla bu iş davam etməyəcəkdi və yolların ayrılması lazım idi:

“Əgər bir insan ancaq maddi vəziyyəti, özünə hörmət etməyərək yanlız kontraktından gələn pul haqqında düşünürsə, onun pulunu verib, yola salmaq lazımdır. Bu adamdan bizə heç bir kömək gələ bilməzdi. Komandanı Ukrayna ilə matça çıxaracaq Ayxan Abbasov Azərbaycan futbolunda özünü sübut etmiş məşqçidir. U-21 komandasında baş məşqçidir. Milli komandanın ruhunu da, hər şeyini də bilir. Hətta bundan sonra da komandanı davamlı şəkildə ona tapşırmaq olar. Azərbaycan yığma komandasına yerli məşqçi rəhbərlik etməlidir. Bizim xarici məşqçiyə ehtiyacımız yoxdur. Bu işin öhdəsindən özümüz də gələ bilərik”.