Heyətini yeniləyən və bu mövsüm də çempionluq üçün mübarizə aparan "Qarabağ"ın iki futbolçusu ilə bağlı yeni xəbər var.

Axar.az Qol.az-a istinadla xəbər verir ki, Ağdam təmsilçisinin yeni transferlərindən olan hücumçu Zakaria Savo artıq məşqlərə başlayıb.

Qambiyalı futbolçu iyulun 30-u SSKA-ya (Bolqarıstan) qarşı Sofiyada keçirilən UEFA Avropa Liqasının 2-ci təsnifat mərhələsinin cavab matçında zədə almış, o vaxtdan bəri komandasının vacib oyunlarını buraxmalı olmuşdu.

Təxminən 5 həftəlik fasilədən sonra Savo artıq hazırlıq prosesinə qoşulub. Düzdür, o, hələ tam hazır vəziyyətdə olmadığından dünən "Araz Naxçıvan"a qarşı keçirilmiş Misli Premyer Liqasının 4-cü tur matçında heyətdə yer almayıb. Amma ola bilsin, biz bu həftə Savonun adını "Zirə"yə qarşı 5-ci tur oyununun (13 sentyabr) iştirak ərizəsində görə bilək.

"Qarabağ" azarkeşləri üçün məyusedici xəbər isə Bəhlul Mustafazadə ilə bağlıdır.

Bu ilin fevralında üzləşdiyi zədə səbəbindən 6 ay oynamayan 27 yaşlı mərkəz müdafiəçisi yenə yaşıl meydanlardan kənarda qala bilər.

Məlumata görə, Mustafazadənin ayağının əməliyyat olunan hissəsində problem yaranıb. Mümkündür o, müayinə olunmaq üçün yenidən ölkə xaricinə üz tutsun. Bu halda, Mustafazadə daha bir neçə matçda komandasına kömək edə bilməyəcək.

Qeyd edək ki, B.Mustafazadə bu mövsüm cəmi 1 oyunda - "Şamaxı" ilə çempionatın 1-ci tur matçında iştirak edə bilib.