Milli komandanın və "Qarabağ"ın kapitanı Rəşad Sadıqov ötən gün "CBC Sport"un "İmza" verilişinin qonağı olub.

Milli.az xəbər verir ki, jurnalistin kapitana ünvanladığı "Neftçi"də oynadığınız vaxtlarda deyilənə görə, sizə "Xəzər Lənkəran"dan 1 milyonluq transfer məbləği təklif edilib. Bu söz-söhbət həqiqətdirmi" sualına Rəşad belə cavab verib:

"Belə bir danışıq olmuşdu. Mənə 2 illik müqavilə təklif olunmuşdu. 2 illik müqavilə hətta 1 milyondan da çox edirdi. Hərdən qarışdırırlar ki, "Rəşada 1 ilinə 1 milyon təklif edilib". Amma, əslində, o məbləğ iki il üçün nəzərdə tutulurdu. "Xəzər Lənkəran" rəhbərliyi ilə görüşdük də. Mən o görüşə getdikdə "Neftçi" rəhbərliyini xəbərdar etmişdim ki, məni belə bir görüşə çağırıblar. Hörmət əlaməti olaraq "Xəzər Lənkəran" rəhbərliyinin görüşünə gedəcəm.

"Neftçi"yə bildirməmişdim fikrim nədir. Amma qərarımı bilirdim. Hardasa 30-40 dəqiqə aramızda danışıq oldu, "Lənkəran" rəhbərliyi ilə tanış olduq. Çünki o adam Azərbaycan futbolu üçün çox şey edib. Və görüşdə qəti bildirdim ki, "Neftçi"dən ayrılmaq istəmirəm".

R.Sadıqov konkret ad açıqlamasa da, görüşdüyü şəxsin "Xəzər Lənkəran" klubunun sahibi Mübariz Mənsimov olduğu ehtimal edilir.