Ana səhifə İdman |
Ağır çəkili idmançı, məşhur Vitali Kliçkonun qardaşı Vladimir Kliçko ilə bolqar Kubrat Pulev arasında sentyabrın 6-na planlaşdırılmış titul yarışı ukraynalı idmançının zədə alması səbəbindən təxirə salınıb.
Axar.az xəbər verir ki, IBF, WBA və WBO versiyaları üzrə dünya çempionu Vladimir Kliçko Avstriyada məşq düşərgəsində məşqlər zamanı vətərini zədələyib. Döyüşün oktyabrın sonunda keçiriləcəyi gözlənilir. May ayında bolqarıstanlı Kubrat Pulevlə amerikalı Toni Tompsonun görüşündə Pulev qalib gəlib və məcburi IBF iddiaçısı olub. Bundan sonra Beynəlxalq Boks Federasiyasının (IBF) rəhbərliyi Vladimir Kliçkoya Pulevə qarşı döyüşdə öz titulunu qorumağı tapşırıb.
Pulevlə döyüş ukraynalı idmançı üçün Aleksandr Povetkin (WBA) və Aleks Leapai (WBO) ilə döyüşlərdən sonra artıq üçüncü məcburi müdafiə olacaqdır. Vladimir bolqar idmançıya qalib gələrsə, WBC versiyası üzrə yeni çempionla birləşdirici yarış keçirməyi və öz kolleksiyasına çatışmayan daha bir kəmər əlavə etməyi planlaşdırır.
Tarix
2014.08.25 / 22:24
|
Müəllif
Axar.az
|