"Hazırda struktur üzərində iş gedir. Hələ tam təsdiqlənməyib. İndiyə qədər cəmi 3 təyinat baş tutub. Yeni idman direktoru Vəli Qasımov Azərbaycanın tanınmış futbolçusu olub. Qapıçılar üzrə məşqçi Dmitri Kramarenko uzun müddət yığma komandamızda çıxış edib. Müavinim Mübariz Xudiyev isə 8 ildi bu klubda çalışır. Gördüyünüz kimi, onların heç biri mənim adamım deyil".

Bu fikirləri "Neftçi" klubunun icraçı direktoru Elnur Məmmədov apasport.az-a geniş müsahibəsində söyləyib. İcraçı direktor xadimələr, fəhlələr, təhlükəsizlik xidmətinin əməkdaşlarının işdən çıxarılmasına da münasibət bildirib:

"Klubda bütün işlər beynəlxalq standartlara uyğun görülür. Bu gün kimsə öz xahişi ilə işdən ayrılırsa, yəqin ki, o, yeni üslubda işləmək istəmir. Son iki gündə klubdan ayrılan bütün insanlar öz ərizələri ilə gediblər. Heç kim onları məcbur etməyib".

E.Məmmədov deyib ki, hər biri ilə görüş olub, hamısı ilə də öpüşüb ayrılıblar. Onun sözlərinə görə, klubun formalarının bundan sonra AFFA-da yuyulacağı xəbərləri iftiradır: "Çox maraqlıdı ki, idman sahəsindən heç kim danışmır, hamı texniki məsələləri gündəmə gətirir. Məncə, ictimaiyyət üçün idman sahəsindəki proseslər daha maraqlı olar, nəinki texniki işlər. Çalışırlar şou düzəltsinlər".