"Qəbələ" futbol klubunun Avropa Liqası yarışlarının birinci təsnifat mərhələsindəki rəqibi Gürcüstanın "Dinamo" (Tbilisi) komandasıdır. "Dinamo" qonşu ölkənin ən titullu klubudur.

Azərtac xəbər verir ki, əsası 1925-ci ildə qoyulan klubun tarixi ərzində ən böyük uğuru 1981-ci ilə təsadüf edib. 1980/1981-ci il mövsümündə gürcüstanlılar Kuboklar Kubokunu başı üzərinə qaldırıb. Ümumiyyətlə, "Dinamo"nun əsas uğurları SSRİ çempionatlarında çıxış etdiyi dövrə təsadüf edib. 1936-1990-ci illərdə tbilisililər 20 dəfə ölkə çempionatının mükafatçıları sırasına düşüblər. 1964-cü və 1978-ci illərdə SSRİ çempionu titulunu qazanan komanda 5 dəfə gümüş, 13 dəfə bürünc medala yiyələnib. "Dinamo" SSRİ kubokuna da iki dəfə yiyələnib. 1976-cı və 1979-cu illərdə kuboku başı üzərinə qaldıran Tbilisi təmsilçiləri 6 dəfə finalda məğlub olub.

Gürcüstanın müstəqillik əldə etdiyi vaxtdan sonra "Dinamo" ölkə daxilində hegemonluğa sahib olub. Amma daxili arenadakı saysız-hesabsız titullara baxmayaraq, beynəlxalq səviyyəli yarışlardakı bütün uğurlar SSRİ dövründə qalıb.

1990/1991-ci il mövsümündə start götürən Gürcüstan çempionatlarında 15 dəfə 1-ci olan "Dinamo" 2012/2013-cü və 2013/2014-cü il mövsümlərində də əldə etdiyi titulu son yarışda əldən verib. Paytaxt təmsilçisi ötən mövsümü 3-cü pillədə başa vuraraq Gürcüstan çempionatının bürünc mükafatını qazanıb. On iki dəfə kubokun finalında çıxış edən "Dinamo" yalnız 1 dəfə kuboku qazanmaq şansını qaçırıb. Əldə edilən 11 kubokdan ikisi "Qızıl dubl"la nəticələnən 2012/2013 və 2013/2014-cü il mövsümlərinə təsadüf edib. Səkkiz dəfə Superkubok matçına çıxan paytaxt klubu 5 dəfə bu mükafata yiyələnib. "Dinamo"nun zəngin kubok kolleksiyasında daha bir titul var. Gürcüstan təmsilçisi 2004-cü ildə "Birlik kuboku"na yiyələnib. Bununla da 9 il əvvəl finalda uduzduğu turnirdə ilk və son uğuruna imza atıb. Hazırda baş məşqçisi Qia Qequçadze olan komandanın əsasını yerli futbolçular təşkil edirlər. "Dinamo" ev oyunlarını 55 min azarkeş tutumuna malik Boris Payçadze adına "Dinamo" stadionunda keçirir.