"Dağıstan Neft-qaz Şirkəti hər il 7 milyon ton neft hasil etməyi nəzərdə tutur".

Axar.az xəbər verir ki, bu barədə informasiyanı "RİA Dağıstan" yayıb.

Məlumatda şirkətin qaz hasilatını artırmağı da nəzərdə tutduğu bildirilib. Belə ki, kompaniya gələn il üçün 5-7 milyard kub metr arası qaz hasil etməyi planlaşdırıb. Agentlik şirkətin 2015-ci il üçün nəzərdə tutduğu göstəricələrə Xəzər dənizinin şelf zonasında aparacağı hasilat hesabına çatacağını vurğulayıb.

Qeyd edək ki, ekspertlər Mahaçkalanın bu iddialarının mənasız olduğunu bildiriblər. Rusiyalı ekspert Mixail Çernışov hazırda Xəzərdə hansısa hasilat işinə başlamaq üçün 1 milyard dolların gərəkdiyini söyləyib. O, bir dəniz qazma qurğusu üçün Mahaçkalaya 200 milyon dolların lazım olduğunu, lakin Dağıstanın hələlik bunu təmin edəcək səviyyəyə çatmadığını vurğulayıb.

Onu da xatırladaq ki, Dağıstan Neft-qaz Şirkəti bu ilin iyununda yaradılıb. Şirkətin bütün səhmləri rəsmi Mahaçkalaya məxsusdur. Hazırda şirkətin nizamnamə kapitalı 10 milyon rubldur. Bəzi mənbələr şirkətin Prezident Ramazan Abdullatipov tərəfindən yaradıldığını irəli sürür. Bu işdə Abdullatipova digər avar milyonçular da yardım edir.