"Neft bazarında son günlər heç bir fundamental səbəb olmadan qiymətlər 5-6 dollar qalxıb".

Axar.az xəbər verir ki, bu açıqlama ilə iqtisadçı ekspert Natiq Cəfərli çıxış edib. O, neftin qiymətinin yaxın günlərdə ucuzlaşacağını bildirib:

"Neft bazarında son günlər heç bir fundamental səbəb olmadan qiymətlər 5-6 dollar qalxıb. İllərdir bu bazarı diqqətlə izləyən biri kimi deyə bilərəm ki, bu, növbəti kəskin düşüşün əlamətidir. Çünki Çinin, AB-nin Sənaye Emalı İndeksi (PMİ) yanvar ayında xeyli aşağı düşüb. Qışın mövsüm təsiri bitir, yaz ayları isə neftə tələbatın təbii azalması mövsümüdür. Neftdən istilik alma rejimi bitir, tətil mövsümünə (avtomobil səyahətləri) hələ var. Liviya, İraq və İran yeni həcmlə bazara daxil olmaq istəyir. Qiymətin enməsində az da olsa rolu olan siyasi proseslər hələ davam edir. ABŞ-da slansla məşğul olan iri şirkətlər təmərküzləşmə yolu ilə maya dəyərini azaltma yoluna gedirlər".

Ekspert neftin qiymətinin son günlər heç bir fundamental səbəblər olmadan qalxmasına belə aydınlıq gətirib:

"İri treyderlər növbəti qiymət azalmasından öncə "qısa mövqeləri" bağlayırlar. Rusiya treyder şirkətləri (əsasən də İsveçdə) son kart olaraq "öküz trendi" yaratmağa çalışırlar və anlamırlar ki, əksinə, pul itirəcəklər. Amma risk edirlər, çünki əllərindəki havayı, qazanılmamış, oğurluq pullardır. ABŞ-da 96 buruq işini dayandırıb, bu da təmərküzləşmə ilə bağlıdır, amma treyderlər bunu küyə salıb, əllərində olan fyuçersləri (qiymətli kağızlar) baha satıb, "qısa mövqelərini" bağlayırlar. Bir sözlə, bu "uçuş", növbəti sərt "enmənin" anonsudur..."