Azərbaycan bankı Küveyt vətəndaşlarına məxsus bankdan şəriət qaydaları ilə kredit alıb.

Axar.az xəbər verir ki, Küveytin "Varba Bank"ı Azərbaycan Beynəlxalq Bankına şəriət qaydaları (sharia-complaint) ilə 150 milyon dollar məbləğində sindikatlaşdırılmış kreditin təşkil olunduğunu bəyan edib. Fins.az-ın məlumatına görə, "J.P. Morgan Bank", "Citigroup", "Barva Bank", "Al Hilal Bank", "Noor Bank and Dubai Islamic Bank" sindikatın iştirakçılarıdır. "Varba Bank" konsorsiumda 20 milyon dollar ilə iştirak edir, qalan məbləğ digər iştirakçılar tərəfindən təmin olunacaq.

Qeyd edək ki, "Varba Bank" 2010-cu ildə Küveyt Əmirinin fərmanı ilə yaradılıb. Bankın nizamnamə kapitalının 24 faizi Küveyt İnvestisiya Təşkilatına, qalan hissəsi isə Küveyt vətəndaşlarına məxsusdur.

Onu da əlavə edək ki, şəriət qaydaları ilə kredit alan Azərbaycan Beynəlxalq Bankı (ABB) İslam bankçılığını regionda ilk tətbiq edən bankdır. Bankın İslam bankçılığı departamenti 2013-cü ilin aprel ayından xidmət göstərməyə başlayıb.