"Müflisləşmə və iflas haqqında" Azərbaycan Respublikasının Qanununda dəyişiklik edilsin.

Axar.az xəbər verir ki, bu təkliflə iqtisadçı-ekspert Qubad İbadoğlu çıxış edib. Ekspert "Fiziki şəxslərin müflisləşməsi" haqqında ayrıca qanunun qəbulunu da təklif edib:

"Mövcud qanunvericilikdə işlədilən "borclu" anlayışı həm borclu müəssisələrə, həm də fərdi borclulara aid edilir. Amma bu qanun fiziki şəxslərə özlərini müflis elan edib onu rəsmiləşdirmək hüququ vermir.

Təklif edirəm ki, vətəndaşlara da belə bir hüquq şamil olunsun və borcu olan, onu qaytarmaq qabliyyətinə malik olmayan fiziki şəxslər özlərini müflis edib, ərizəsini və müvafiq sənədlərini məhkəməyə təqdim etsinlər".

Q.İbadoğlunun sözlərinə görə, məhkəmələrdə fiziki şəxslərin borclarının yenidən strukturlaşması planı ola bilər:

"Onların ödəmə qabiliyyətinin vəziyyəti əsasında, dəbbə pulları (cərimə, penya) saxlanılmaqla, onlara 3 ildən 5 ilədək kredit tətilləri verilsin. Beləliklə də məhkəmələrin qərarı ilə müflis hesab edilən vətəndaşlar borc aldıqları banklara müraciət edə və öhdəliklərinin müəyyən dövrdə dayandırılmasına nail ola bilər. Bu təklifin reallaşması "parnik banklar"ı da düşdüyü böhranlı vəziyyətdən çıxara bilər".