Gənclər və idman naziri Fərid Qayıbov Azərbaycan Dillər Universitetində (ADU) tələbələrlə görüşüb.

Kult.az xəbər verir ki, görüşdə ADU-nun rektoru, akademik Kamal Abdulla ADU-ya yüksək balla qəbul olan tələbələrin sayının artmaqda olduğunu vurğulayıb.

ADU-nun QS reytinqində uğurları haqqında da məlumat verilib.

Rektor çıxışında 44 günlük müharibə zamanı tələbələrin fəallığından da söz açıb. Qeyd olunub ki, tələbələr müxtəlif xarici dillərdə dünya ölkələrinin hökumət strukturlarına məktublar ünvanlayaraq Azərbaycan həqiqətlərini çatdırıblar.

Gənclər və İdman naziri Fərid Qayıbov çıxış edərək bildirib ki, gənclərin həm intellektual, həm də fiziki inkişafı dövlət siyasətinin əsas istiqamətlərindən biridir. Nazir çıxışında ali təhsil müəssisələrinin bu prosesdə mühüm rol oynadığını vurğulayaraq universitetlərin gənclərin potensialının üzə çıxarılmasında, onların təşəbbüskarlıq və liderlik bacarıqlarının formalaşmasında xüsusi əhəmiyyət daşıdığını qeyd edib.

Söhbət zamanı gənclərin beynəlxalq idman və gənclər proqramlarında iştirakının artırılmasının vacibliyinə toxunulub, bu sahədə universitetlərlə əməkdaşlığın genişləndirilməsinin önəmi diqqətə çatdırılıb.

Görüş tələbələrin sualları ilə davam edib. Tələbələr gənclər siyasəti, idman infrastrukturu, beynəlxalq mübadilə proqramları və şəxsi inkişaf imkanları ilə bağlı suallarını ünvanlayıblar.