MB banklar tərəfindən xarici valyutada cəlb edilən öhdəliklər üzrə məcburi ehtiyat normasını bundan sonra da artırmalıdır.

Bu sözləri Axar.az-a açıqlamasında iqtisadçı ekspert Samir Əliyev deyib.

Onun sözlərinə görə, MB tərəfindən dedollarizasiya (dollarlaşmaya qarşı – red.) prosesi ilə bağlı addımların atılmasının müxtəlif mexanizmləri var:

"Bunlardan biri, ilk növbədə məcburi ehtiyat normalarının artırılmasıdır. Bu addımlar kompleks şəkildə həyata keçirilməlidir. Məcburi ehtiyat normasının, əslində, 5 faizə qədər artırılmasına ehtiyac var. Bu norma tədricən qaldırılmalıdır. Dollarlaşmanın qarşısının alınmasının əsas yolu dollar kreditləşməsini məhdudlaşdırmaqdır. Burada söhbət dollarla verilən kreditlərin qadağan edilməsindən yox, məhdudlaşdırmanın yollarından biri kimi dollar üzrə məcburi ehtiyat normalarının qaldırılmasından gedir. MB bu addımı ona görə atdı ki, banklar manatla depozitlərə daha çox üstünlük versinlər. Manatın rolunun artırılması istiqamətində faizlər də gücləndirilməlidir. Çünki bu həm də insanların etibarının artması baxımından vacibdir".

Qeyd edək ki, Mərkəzi Bank dollarlaşma səviyyəsinin azaldılması, habelə bank sektorunda maliyyə sabitliyinin gücləndirilməsi məqsədilə heyətin 3 mart tarixli qərarına əsasən, banklar tərəfindən xarici valyutada cəlb edilən öhdəliklər üzrə məcburi ehtiyat norması 0.5%-dən 1%-ə yüksəldib, qeyri-rezident maliyyə sektoru qarşısında öhdəliklər və beynəlxalq maliyyə institutları ilə hesablaşmalar üzrə məcburi ehtiyat normasını isə 0.5%-dən 0%-ə endirilib.