Sosial şəbəkələrdə Hacı Zeynalabdin Tağıyevin pasajında (Köhnə Univermaq) aparılan bərpa işlərinə dair fotolar yayılıb. Paylaşılan görüntülərdə tarixi pasajın ilkin memarlıq üslubundan kənara çıxıldığı, ümumi strukturunun isə ciddi şəkildə dəyişdirildiyi müşahidə olunur. Aparılan işlər tarixi abidənin orijinallığına zərər vurub və bu da ictimaiyyət arasında narazılıq doğurub.

Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Kult.az-a açıqlamasında iradlar tamamilə qəbul edilib.

Bildirilib ki, Azərbaycan qanunlarına əsasən, abidələrin bədii-estetik görkəminin dəyişdirilməsi, uçurulması və onlar üçün təhlükə yarada biləcək təmir, inşaat, təsərrüfat və digər işlərin aparılması qadağandır:

“Abidələrin üzərində bərpa, konservasiya, təmir və digər işlər, onların layihələri Dövlət Xidməti tərəfindən təsdiq edildikdən sonra aparılmalıdır. Abidələrin qorunması haqqında Azərbaycan Respublikası qanunvericiliyinin pozulması cinayət, inzibati, intizam və mülki məsuliyyət yaradır.

Təəssüflər olsun ki, illər öncə tarixi abidələrin bərpası, onların üzərinə məişət qurğularının, reklam lövhələrinin yerləşdirilməsi kimi işlər razılaşdırılmadan həyata keçirilib və müdaxilələrə yol verilib. Bütün bunlar da öz növbəsində tarixi abidələrin memarlıq dəyərinin itirilməsi, estetik görkəminin dəyişdirilməsi, dayanıqlığına xələl yetirilməsi və ciddi konstruktiv pozuntularla nəticələnib. Belə halların aradan qaldırılmasına uzun müddət və əlavə vəsait tələb olunur”.