Bakı Beynəlxalq Multikulturalizm Mərkəzi, Azərbaycan Milli Elmlər Akademiyası və Azərbaycan Yaradıcılıq Fondunun birgə nəşri olan "Multikulturalizm" jurnalının ikinci sayı işıq üzü görüb.

Axar.az Sim-sim.az-a istinadən xəbər verir ki, jurnalın "Azərbaycançılıq" rubrikasında Prezident İlham Əliyevin BMT-nin Sivilizasiyalar Alyansının VII Qlobal Forumundakı nitqi yer alıb.

Bundan başqa, "Homo Sapiens" rubrikasında Qan Turalının "İnsan olmanın macəra dolu qəddar tarixi", "Tənqid və esseistika" rubrikasında Şərif Ağayarın "İki qitəni birləşdirən və ayıran yazıçı" yazısı, "Höte zalı" rubrikasında şair-tərcüməçi Səlim Babullaoğlunun polyak şairi, ədəbiyyat üzrə Nobel mükafatı laureatı Çeslav Miloşdan tərcümələri, eləcə də İtalo Kalvinonun "Nizaminin "Yeddi gözəl"i" adlı essesi, Ömər Xəyyamın İsmayıllının haputlar yaşayan kəndləri haqqında reportajı dərc olunub.

"Axundov zalı" bölməsində tanınmış şairlərdən Mətləb Ağanın, Aqşin Yeniseyin, Qismətin şeirləri dərc edilib.

Qeyd edək ki, jurnalın nəşr olunmasında məqsəd Azərbaycanda əsrlərdən bəri formalaşmış tolerantlıq ənənələrini təbliğ etmək, ölkəmizdə hökm sürən multikultural mühitə töhfə verməkdir.