Özbəkistanlı məşhur sənətçi Yulduz Turdiyeva Türkiyə Silahlı Qüvvələrinin Suriyanın şimalında keçirdiyi "Sülh çeşməsi" əməliyyatına dəstək verib.

Kult.az xəbər verir ki, o, Heydər Əliyev Sarayında təşkil edilən “Özbəkistandan sevgilərlə” adlı konsert programında Özbəkistan, Türkiyə və Azərbaycan qardaşlığına dair müsbət mesajlar verib.

Özbəkistanın xalq artisti Yulduz Turdiyeva konsert proqramında türk sənətçi Pınar Eliçe ilə duet oxuyub. Duet zamanı Türkiyə Prezidenti Rəcəb Tayyib Ərdoğan ilə Özbəkistanda “Bərabər yürüdük biz bu yollarda” mahnısını oxuduğu xatırladılıb.

Konsertin ardından Türkiyə səfirliyinin mətbuat müşaviri Hüseyin Altınalan ilə görüşən Turdiyeva Türkiyənin terrorla mübarizəsinə dəstək verdiyini bildirib. Altınalanın "Bu dəstəyi əsgər salamı verərək göstərməyiniz mümkündürmü?" xahişi özbəkistanlı sənətçi və orkestr üzvləri tərəfindən alqışlarla qarşılanıb.

Turdiyeva və orkestr üzvləri türk əsgərinə və Türkiyənin "Sülh çeşməsi" əməliyyatına dəstəklərini ifadə etmək üçün əsgər salamı verib.