Ana səhifə Kult |
Qarabağdakı separatçıbaşının köməkçisi Rudik Usnunts kartof soyarkən çəkilmiş fotosunu sosial şəbəkədə paylaşıb.
Açığı, təəccübləndim, dedim, burnunun dibində müharibə gedir, bu adam əbləhcəsinə şüşə qəfəsində oturub kartof soyur. Əvvəl elə bildim, bu, ermənilərin təzə planıdır: Qarabağın əldən çıxdığını görüb, bütün dünyaya elan edəcəklər ki, bəs, kartofun vətəni Ermənistandır.
Amma uzun müddət araşdırma aparandan sonra məlum oldu ki, Rudikin məqsədi tam başqadır. Belə ki, cəbhədə xeyli sayda texnika itirən düşmən artıq kartofdan silah düzəltməyə hazırlaşır. Son məlumatlara görə, Rudik kartofları soyub qurtarandan sonra bunu erməni əsgərlərə verəcək, onlar da bu kartofları mancanaqlar vasitəsilə ataraq, Ordumuzun mövqelərinə ağır zərbələr endirəcəklər və daha sonra Ovannisyan demiş, “taktiki olaraq” geri çəkiləcəklər.
Ermənilər deyirlər ki, Rudik niyə döyüşə getmir?
Düzü, mən Rudikin 18 yaşlı erməni əsgərləri səngərə göndərib qırdırmasını başa düşürəm. Axı o özü mətbəxdə çox ağır bir vəzifəni yerinə yetirir.
Bəli, bu dəhşətli sirri açıqlamalıyam: Ermənistan Rudikin timsalında dünyanı şoka salan silah – Tank Əleyhinə Zenit Kartof Kompleksləri (TƏZKK) hazırlayır.
Aldığım son məlumata görə, erməni ordusu öz arsenalına Özüyeriyən Qonşusuduran Çuğundur haubitsaları, Badımcan Qızartması Yayılım Atəşli Reaktiv Sistemi, Üçbacı Minaatan Turşusatan mərmiləri, Mayonezini Bol Elə qumbaratanlarını daxil edəcək.
Açığı, qorxuram, bunlar sabah keşniş-şüyüd tərkibli nüvə başlıqlı artilleriya qurğusu da istehsal edərlər.
Ermənidir də, nə desən, gözləmək olar...
Tarix
2020.10.28 / 10:55
|
Müəllif
Şeyx Teymur
|