Azərbaycanda və Türkiyədə Polad Ələmdarın oxşarı kimi tanınan Tural Əsgərovla yeni çəkildiyi "1 milyon manat" filminin premyerasında tanış olduq. Tanımasaydım, elə bilərdim, qarşımdakı şəxs elə Poladın özüdür. Bir çox media nümayəndələrinə müsahibə verməkdən imtina edən Tural bəy suallarımızı cavablandırmağa razılaşdı.

Polad Ələmdarla tanışıq...

- Tural bəy, maraqlıdır ki, məşhur "Qurdlar vadisi"nin baş qəhrəmanı Polad Ələmdar obrazını canlandıran Necati Şaşmaz sizi tanıyırmı?

- Əslində, Necati bəylə üz cizgilərimiz bənzəsə də, onunla yaş və boy fərqimiz var. Necati bəy məndən 10 yaş böyükdür. 1971-ci il dekabrın 15-i o gəlib dünyaya, 1981-ci il 21 sentyabrda isə mən. Onun boyu 168, mənimki isə 183 sm-dır. Şəxsən tanışıq.

- Tanışlığınız harada baş tutdu və sizi gördükdə çoxmu təəccübləndi?

- Mötəbər nazirlərimizdən birinin dəvəti ilə o, 2011-ci il mart ayının 19-u Azərbaycana gəldi. Hava limanında onu Mehriban Xanlarova ilə mən qarşıladım. Əlbəttə, məni gördükdə çox təəccübləndi. "Gəncliyimə bənzəyirsən", - dedi. Məni Tüykiyəyə dəvət etdi və elə həmin il "Panafilm"in xətti ilə Türkiyədə 3 gün onun qonağı oldum.

- Elə isə Necati Şaşmaz haqqında bizə danışın. Onu nə cür insan kimi tanıdınız? Və oxşarınız o 3 gündə yaddaşınıza necə həkk olundu?

- Necati bəy haqqında yalnız bir söz deyə bilərəm: kim onun qədər zəngin, imkanlı və məşhur olsaydı, hazırda yolunu azmışdı. Amma bu insan olsuqca sadə və səmimidir. 3 gün onun qonağı oldum, gəzməli-görməli yerləri bərabər ziyarət etdik, çoxlu söhbətlərimiz oldu, şahmat oyunları və s.

"Qurdlar vadisi"ndən yeni təklif...

- Düşünürdüm ki, Necati bəylə hər hansı bir pyoje üzərində çalışacağınız haqqında açıqlama edəcəksizniz?

- Əslində, iki dövlət arasında olan qardaşlıq haqqında birgə film çəkmək arzumuz oldu. Amma hələ ki, bu istək elə arzu olaraq qalır.

- Azərbaycanda isə uğurlarınız olduqca boldur; bu yaxınlarda yeni çəkildiyiniz "Bir milyon manat" filminin təqdimatı keçirildi. Daha hansı filmlərdə yer almısınız?

- Yeni çəkildiyim "Bir milyon manat" filmində elə Polad Ələmdarı canlandırıram. Çox xoşbəxtəm ki, bu filmdə xalq artisti Hacı İsmayılovla tərəf müqabiliyəm. Əlavə olaraq, yerli telekanalın birində yayımlanan "Boyunbağı" serialında baş qəhrəmanlardan birini canlandırıram. Burada sırf özümü oynayıram desəm, yanılmaram. Seriala tam təmənnasız çəkilirəm. Ümumiyyətlə, incəsənəti çox sevirəm və yaradıcılığa olduqca bağlı insanam.

- Türkiyədə olduğunuz müddətdə nə üçün Necati bəy sizi telekanalların verilişində oxşarı kimi təqdim etmədi? Ola bilərmi ki, bu daxili narazılıq hissi ilə bağlı olsun?

- (Susur)...

- Axı nisbətən gənc və hündürboy bir "Polad Ələmdar" onun yerini tuta bilərdi?!

- Türkiyəyə səfərim Ramazan bayramına təsadüf etdiyi üçün biz heç bir telekanala dəvət almadıq. Mənimlə bağlı fikirləri haqqında heç nə deyə bilmərəm. Amma bu səfərdən sonra yenidən Türkiyəyə qayıtdım; bu dəfə "Yetənəksizsiniz" verilişinin iştirakçısı kimi.

- Deməli, Türkiyə sizi tanıdı. Milyonlarla izləyicisi olan verilişin iştirakçısı olmaq hər insana nəsib olmur. Ora necə dəvət aldınız?

- Verilişi tam izləyirdim. İnandırım sizi ki, heç bir kömək olmadan layihə rəhbəri və münsif Acun bəyə elektron məktubla müraciət etdim. Tezliklə, məni verilişə dəvət etdilər. Onu da qeyd edim ki, türk dilini olduqca gözəl bilirəm və verilişdə türk dilində səsləndirdiyim şeirlərin müəllifi özüm idim. Ümumiyyətlə isə ailəmizdə iki şair olub: babam və atam.

- Çox gözəl. Amma verilişdə, bildiyim qədər, finala vəsiqə qazana bimədiniz.

- Elədir. Cəmi iki tur iştirak edə bildik. Birinci tur hər kəs üçün maraqlı oldu. Türk tamaşaçısı və münsiflər şokda idilər. Daha çox "Qurdlar vadisi"nin baş qəhrəmanlarından olan Əlif obrazını canlandıran Özgün Amal təəccüb etdi. Onun xoş sözləri bizim ikinci tura keçməyimizə təkan verdi. Lakin elə Əlif xanımın sayəsində biz ikinci turda yarışmaya əlvida demək məcburiyyətində qaldıq.

Ailəsində söz-söhbət yarandı...

- Maraqlıdı...

- Mənim səhnədən Əlif xanımın - Özgün Amalın suallarına filmdən olan epizodlarla cavab verməyim xanım münsifin həyat yoldaşının xoşuna gəlmir. Məndə olan məlumata görə, gənc ailədə çox böyük söz-söhbət yaranmışdı.

- Film nümayiş olunan zaman hər kəs Necati bəylə Özgün Amalın yalnız filmdə deyil, elə real həyatda uzun illər sevgili olduğunu deyirdi.

- Bəli. Elə ona görə də ikinci turda Özgün xanım qəhərlənərək, bizə "yox" deməyə məcbur qaldı və biz 65% səs azlığı ilə ikinci turda iştirakımızı dayandırmalı olduq. Əlif xanım pərdə arxasına gələrək, mənimlə görüşdü. O ağlayırdı və yalnız bir kəlmə söyləyə bildi: "Nə olur, Tural, məni əfv et!"

Məşhur "Yetənəksizsiniz"də yenidən...

- Maraqlıdır ki, siz Türkiyədə filmə çəkilsəydiniz və Əliflə bir səhnəni paylaşsaydınız, onun həyat yoldaşı necə hərəkət edərdi?

- (Gülür) Onu deyə bilmərəm, amma heç bir yerdə qeyd etmədiyim yeni layihəm haqqında fikrimi sizinlə bölüşəcəm; bu yaxınlarda yenidən Türkiyədə "Yetənəksizsiniz" verilişində iştirak etmək niyyətindəyəm. Budəfəki iştirakıma daha güclü hazırlaşıram.

- Keçən dəfə çıxışınıza hazırlaşmamışdınız?

- İnternet səhifələrində gözəl tərzdə "Qurdlar vadisi" mahnısını ifa edən gənc aşıq Sərxan Əliyev haqqında videoçarx izlədim. Onunla tanış oldum və bu yarışmaya birgə hazırlaşdıq.

- Əlifin həyat yoldaşının qısqanclığı ucbatından yarışmadan uzaqlaşmalı oldunuz. Digər insanların da qısqanclığı həyatınıza və işinizə mane olurmu?

- (Gülür) Bəlkə də olur, amma xəbərim yoxdur.

Ailəmə sadiqəm...

- Ailəlisiniz?

- Bəli, mən çox gənc ikən valideynlərimin arzusu ilə ailə həyatı qurdum və həyat yoldaşım öz qohumumdur. İki qızım böyüyür; böyük qızımın artıq 10 yaşı var və o, ingilis təmayüllü məktəbdə dərs alır, o biri qızım isə hələ kiçikdir.

- Yəqin ki, xanımlar tərəfindən tanışlıqlar və münasibət qurmaq istəyi ilə çox qarşılaşırsınız?

- Bəli. Belə hallar həddindən artıq tez-tez baş verir.

- Bu tanışlıqlara necə cavab verirsiniz və xanımınız sizi qısqanmır ki?

- Birmənalı şəkildə tanışlıqdan imtina edirəm. Bəzən olur ki, xanım hansısa dost-tanış tərəfindən mənimlə tanışlıq yaradır, o zaman sadəcə, dost qalmağımıza üstünlük verirəm. Mən ailəliyəm və ailədə xəyanəti bağışlanmaz səhv kimi qəbul edirəm. Həyat yoldaşım isə mənim ona sadiq olduğumu gözəl bilir, odur ki, heç bir qısqanclıq da göstərmir.

Mafiyaya "yox" cavabı...

- Polad Ələmdar rolunu canlandıran Necati Şaşmazın dünyanın tanınmış mafiya üzvləri ilə dostluq münasibətləri haqqında Türkiyə mediasında kifayət qədər danışıldı. Tural Əsgərova "qaranlıq dünyanın" insanlarından dostluq təklifi gəlsə, qəbul edərmi?

- Qətiyyən. Mən sakit həyat tərzinə üstünlük verirəm. Əslində, saysız-hesabsız dostlarım var. O qədər çoxdurlar ki, adlarını yadımda saxlamağa belə çətinlik çəkirəm. Ola bilər, onların arasında qeyd etdiyiniz "qaranlıq aləmin" nümayəndələri də olsun. Hər halda, mən bu haqda xəbərsizəm. Lakin onların dostluq əlaqələrinə kəskin şəkildə "yox" cavabı verərdim.

14 yaşlı tələbə...

- Eşitdiyimə görə, 14 yaşında universitet tələbəsi adını qazanmısınız. Bu məlumat doğrudurmu?

- Tamamilə doğrudur. Ziyalı ailəsində göz açdığımdan, artıq üç yaşımda sərbəst yazmağı və oxumağı bacarırdım. Mənimlə babam məşğul olurdu. Məktəbə 5 yaşım tamam olmamış getdim. Tərtərdə orta məktəbdə təhsil aldım. Sonra bir ilin də proqramını mənimsədim, ekstra-imtahan nəticəsində bir sinif irəlilədim.

- Vunderkind uşaq çox zaman müəllimlərin sevimlisi olur...

- Elədir. Müəllimlərim məni daha çox məntiqi düşüncəmə görə bəyənirdilər. Mən ekstra-imtahan verdikdə komissiya tərtib edildi. Bütün illik proqram haqqında soruşuldu, doğru cavablandırdım. Sonda Bakıdan komissiya qismində təşrif buyuran müəllim mənə sual verdi: "Yarpaq hansı rəngdə olur?" Mən ona elə sual ilə cavab verdim: "Müəllim, hansı fəsildə?" Hər kəs mənim cavabımdan yaxşı mənada təsirləndi.

- Eşitdiyimə görə, universitetə də maksumum nəticə göstərərək qəbul olunmusunuz.

- Doğrudur. O zaman test imtahanları ölkədə ilk dəfə idi ki, keçirilirdi. Mən 1998-ci ildə ən yüksək bal toplayarq, 596 bal ilə İqtisad Universitetinə qəbul olundum. Yadımdadır, imtahan zamanı bizə nəzarətçi təyin edilən müəllim mənim vaxtımdan olduqca tez suallara cavab yazdığımı öyrəndikdə, "guya bunlar hamısı doğrudur ki", - soruşaraq, rişxəndlə gülümsəmişdi.

- Bəz siz ona nə cavab verdiniz?

- Hansı fəndən dərs dediyini soruşdum. Məlum olanda ki, coğrafiya fənnini tədris edir, xahiş etdim ki, coğrafiyadan cavablandırdığım cavablara nəzər salsın. Müəllim cavablara baxdıqda, təəccübünü gizlədə bilmədi; bütün suallara doğru cavab yazmışdım. İmtahan zalından çıxanda onunla sağollaşdım və bu sözləri dedim: "Məni ölkənin ən güclü tələbəsi kimi efirdə göstərəcəklər və siz də bunun şahidi olacaqsınız". Həqiqətən də məni efirdə göstərdilər, hələ üstəlik, həmin müəllim mənə universitetdə uzun illər dərs də dedi.

Unutmaq istədiyim...

- Bütün oxucular üçün də maraqlı olar ki, Tural bəy həyatda unutmaq istədiyi ağır məqamları bizimlə bölüşərmi?

- Qarabağ müharibəsində iki gənc dayımı itirdim. Onlardan biri Ədalət Paşayev Azərbaycanın Milli Qəhrəmanıdır. İllər sonra cavan atam dünyasını dəyişdi. Keçirdiyi avtoqəza xəsarətsiz ötüşsə də, yaşadığı həyəcan onun beyinində sağalmaz iz buraxdı və qısa müddətdə o beyin xərçəngi xəstəliyindən dünyasını dəyişdi. Ailədə bir oğlan övladıyam. Hazırda bütün yaxınlarıma cavan yaşlarında həlak olmuş dayılarımı, dünyasını vaxtsız dəyişmiz atamı qismən də olsa əvəz etməyə çalışıram. Ən azından onlar üçün bir təsəlliyəm...